Hajrong ka thong u yada ya ki thaw rep wa em ha Pynthorñeiñ kiwa chah ktah man-u-snem heipor wa joor slap neidaw wa chlai um ka wah Myntdu, kamtæ haka 22 tarik neiliang ka chnat Water Resources, West Jaiñtia Hills, Jowai kam kawi naka chnat krehkaam sorkar kawa da pynkhreh u wanrah yaka Project dei wow kær kynroh yaka wah Myntdu kamwa 2 Km nadooh na yingkieñ PWD u sarok Jowai-Shillong hadooh ha chka wa tyngkhooh ka wah Myntdu waka Tyrchi, wei chwa wow leh yeini da khut pynman yaka Public Hearing næ i pynsñiaw paidbah hajrong ini i thmu neibhah ye u em ki tre thaw wa daw chah ktah.
Ya kani ka Public Hearing da pynman ha Pynthorñeiñ hi chirup i emlang u Silvester Phanbuh, EAC West Jaiñtia Hills District, ki sahep napoh ka chnat Water Resources, ki warep, ki tre thaw wa em hapoh ka seiñ Myntdu Pynthorñeiñ Farmers Welfare & Producer Organisation wa kiwi.
Heiyatoh wa ini i kreh wa da thmu u pynkreh ha kani ka thaw, neiliang u N. Tariang, SDO Water Resources Jowai khana u wa da pynkhreh ki da ka buit wa rap phær kawa tip kam ka Labyrinth Structure wa kawa man ka kynja Check Dam wym pu em wa leh hapoh North East lait noh kawi ka Project khian wada leh da ki hi ha chnong Demthring, West Jaiñtia Hills District.
Lyngba kani ka Labyrinth Structure kawa daw chna hei dur ka Check Dam wa rap phær hajan ka yingkeiñ kawa ye u pynheh hadooh ar le chah i khlai um, wei kani daw yarap ko chiboon heipor lyiur yow lait nei chlai um wei chah pynsih ki hali kba ha Pynthorñein.
Daw chna leh waka Morning Glory Spillway kawa man kam ka kynja dabor kawa daw em wa u Pipe u wow taan pynmih yaka um rap chawah ka Dam. Kani daw yarap u taan næ yakhun yaka um yow lait ko u chlai palat yeiwa da booh.
Chooh chooh khana u wa ha kani ka 2 Km da mang u kynroh na waroh arliang ka wah Myntdu wei daw chim leh i thaw kajiak kajiak naki tre thaw katkam wa emkaam neibynta u yoh i jooh i heh ka thaw kai um wei daw pait bniah leh katwon emkaam u pynyillu pynkrai yaka luti kai ka um.
Kiwi won ki sahep wa kynthup ya u P. Kurbah, Executive Engineer Water Resource, West Jaiñtia District Jowai da paan ki i yakrehlang na ki warep waki tre thaw khnang wa i thmu yong ki wow lai chakhmat u pynkhreh yaka DPR hajrong u wanrah ya kani ka Project u man ko kawa jop neibynta i myntoi yong ki hi kam ki warep.
Heiyatoh wa ini i thmu neiliang ki warep wa ki tre thaw kiwa da wan emlang ha kani ka sngi leh pynsñiaw ki i mynjur wow e sñiawbha yei thaw yong ki deiwa yooluti leh u man kawa pynmyntoi.
U K.L. Pariat, President Khooid Ya Ka Wah Myntdu uwa man leh uwa e buit yaka Myntdu Pynthorneiñ Farmers Welfare & Producers Organisation, kyntu u ya kani ka chnat krehkaam wow pynkhreh ko dei miat ya kani Project khnang wa i myntoi u neh ko pateiñ la pateiñ.
Neitæ hawa kdaw haroh u yei tngit ka wah Myntdu ong u toh lyngba ki liar wa wan naki bynta waphær ka chnong Jowai, u K.L. Pariat da pynkynmoo u wa wot ki In-Situ Nala wa da chna da ka Municipal haki bynta waphær waphær hajrong i thmu u yada nei kai ki jakhlia cha ka wah Myntdu leh i pynkreh da suki i katni. Wei man-i-por kyntu ki wow kreh smat khnang wa ki warep ym maad ki yei eh i khoo. Wei ha ki bynta ka Pynthorneiñ ki liar wa wan naka Dong Moolaiñ naka liar Kamkam wa kawa wan na Jail toh kawa rah jakhlia cha ka wah Myntdu.
Kamtæ kyntu u wow chimkhia smat neibynta i bha i mait ka Myntdu kamjooh ki bru wa chkeh um naka hei rep i riang kamjooh wow dih.
Discussion about this post