Ka Student For Development (SFD) Meghalaya ka chnat yong ka seiñ Akhil Bharatiya Vidyarthi Parishad (ABVP), Meghalaya kawa toh ya i bynta yong ka rym-aw wow pait wow yoo wow pynmiat pynbha ya ka rym-aw yong i ha ki rukom waphær waphær da lehwarom ko deiwa thung ya ki deiñ ha kylleiñ ka Ri-loom Jaiñtia, Khasi wa Garo ha ki skur wei hadooh ynne ka sngi da dep ki u thung kamwa 1060 tylli ki tre dieñ waphær waphær deiwa chimbynta ki kynnah kamwa 650 ngut wa kiwi kiwi de.
Ka Shillong Unit da lai thung dieñ ki cha skurbah North Eastern Hill University, Shillong ha National Institute of Technolog ha chnong Laitlyngkot. Ka Pynursla Unit da thung ki cha skur SSA Ryngkew Mawlam East Khasi Hills wa ha chnong Mawkliew East Khasi Hills.
Ka Nongpoh Unit da lai thung ki cha chnong Umtham wa ka Sulguri Secondary School Garo Hills. Ka Jaiñtia Hills Unit da lai thung ki cha Seiñ Jait Tuber Hr. Sec. School, Tuber East Jaiñtia Hills, kamjooh leh ha Muthlong Pioneer Sec. School West Jaiñtia Hills, ha Ramkrisha Secondary School Nartiang West Jaiñtia Hills, ha Evergreen English Secondary School Umjalasiaw West Jaiñtia Hills, Khanduli Secondary School West Jaiñtia Hills kamtæ ter ter.
Ka Students For Development da lai e ko leh ya ki dieñ kamwa 2-3 tylli ha kawi pa kawi ki yung krehkaam ki pulit kam ha Police Station yong ka Nartiang, Police Outpost yong ka Saitsama West Jaiñtia Hills, Battalion Camp ka Khanduli West Jaintia Hills ter ter.
Hachwa u thung ya ki dieñ da pynman ka Student For Development ha Khanduli Secondary Sec. School yei yaklam wa tip kam ka Environment Talk heiwa da yoh i klam na ka Nibiang Sumer kawa pynsñiawthooh ya ki kynnah yei emkaam i thung dieñ wa ki rukom u pynneh pynsah ya ka rym-aw yong wei wow pynmiat pynbha ya ki um ki wah yong i.
Ka Darapbiang Mulieh kawa sikai ha Khanduli da ong ko wa ki khynnah leh emkaam u pait bha ki ya ki dieñ wa da thung ki yow miat u bha u myntoi ka imlang ka sahlang waroh.
