U montri rangbah ka jylla Punjab lyngba u Twitter da ong u wa ka Pakistan da pynemkaam da ko ki drone wow pynpoi ya ki tiar siat wa ki kuli chapoh ka ri lyngba ka jylla deiwa kyntu ya u montri wa pait ya ki kaam pohyung ka ri, u Amit Shah wow chimkhia yeini waroh.
Katkam ka yutip wa da yoh da ong wa kini ki drone wa da pynhær da ki seiñ kieñ suloi na Pakistan da phah ki hadooh 80 kilo ki tiar siat, ki suloi wa ki kuli wa da mang wow pynpoi cha ka Khalistan Zindabad Force (KZF) kawa da kyrchaan da ka ISI yong ka Pakistan.
Da ong wa ya kini ki drone da pynhær kamwa 2km napoh Pakistan wei da kit ki ya ki tiar wa khia hadooh 10kilo chisien kit wei ya kini ki tiar da kdoh ha ki tylle ku loom wa da chna ha China.
Neiliang ki pulit ka Punjab da kem ki hadooh san ngut ki bru heiyatoh wa ini wei na kini da yoh ya san tylli ki AK-47 chirup wa ki Magazine, soo tylli ki pistol wa da chna ha China, khynde tylli ki grenade, T. 10 lak ki poisa thok, palat 1000 tylli ki kuli wa kiwi kiwi.
Kam wow pynkynmoo heini ki chipai Indian Air Force ha ka 4 Wisu uni u snem da siat ki ya ka drone yong ki chipai ka Pakistan deiwa pynemkaam ya ka lieñsuiñ yapam Sukhoi Su-30 hadien wa kani ka drone da hær ko chapoh u pood yong ka India.
Discussion about this post