Ka Jowai Polytechnic ka thaw puræ kawa da sdang nadooh u snem 2001 deiwa em le tylli ki chnat namo ki Department wa kynthup yaka Architectural Assistantship, ka Automobile Engineering waka Costume Design & Garment Technology, ha kani ka kynti da man ka sien wa nyngkong dooh yaki khynroo khyllood wa lai puræ wow yohlaad u pynyoo pyrthai yei sap i phong wa ki da yoh sikai ki na kani ka thaw puræ la heiyatoh wa i rukom pynwandur yaki that ki sula, ki yung ki sem, ki kari soo chaka, ar chaka wa ki tiar wa boonjait.
Kani ka rukom pynwandur yong ki toh deiwa dro dur wei pynyoo nongmuna leh lyngba iwa chna hei dur wa khian yaki yung ki sem, ki yung krehkaam wa da chna ki hei rukom waphær waphær, wei da chna pynwandur ki leh ya ki thuk-thuk ki Bicycle wa kiwi.
I yohlaad ki khynroo khyllood wow pynyoo pyrthai yeini i sap yong ki toh lyngba i wan u S.P. Basaiawmoit kam u Principal ka Jowai Polytechnic heiwa hadien wa yoo u yei stat i chemphang kiwa lai puræ lyngba ki kaam namo ki Project wa jooh leh ha man wa kut ka Semister yong ki, da ktik i yei thij i pyrkhat yong oo wa hap u wow leh iyi re iyi khnang yow pynyoo pyrthai yei sap ki khynroo khyllood kani ka thaw puræ.
Kamtæ i thrang i angnood yong oo da sdang man kaam i ynne ka sngi lyngba ka pynyoo rong wa tip kam ka Technophilia 2023, Exhibition Showcase of Arts and Culture & Innovation kawa da pynman daka Jowai Polytechnic hi hapoh i yahkhmat yong oo kam u Principal, heiwa neiliang kiwa lai puræ yong ki le tylli ki chnat da pynyoo rong ki yei sap i phong, i kreh chitom yong ki wei heini i pynyoo rong da wan sakhi da kiwa chah khut sñiawbha wa ki skur waphær waphær.
U S.P. Basaiawmoit hawa e yei klam da ong u wa boon kiwa em sakhiat i sap ha kani ka laiñ tangwa ym em won wa e yumut yaki u wan puræ ha kani ka thaw.
“Ka thong wa hakhmat yong kani ka sngi toh u pynyoo yei sap wa em kiwa puræ ka Jowai Polytechnic najrong u pynyoo leh cha kiwi ki khynroo khyllood ki wym pu bna yeini, neibhah boon ki khynnah wym tip ki wa kani ka Polytechnic em ko heini wow sikai yei sap, em pathan leh kiwa pyrkhat wa ka Polytechnic rap em ko hapoh ko bar yaka Diploma,” da ong u S.P. Basaiawmoit.
Neiliang ka D.V. Lyngdoh, Additional Deputy Commissioner, West Jaiñtia Hills District hawa wan sakhi kam ka kongsan ha kani ka sngi da yaroh ko yei stat i chemphang kiwa puræ wei ym poi pyrkhat ko u yoo kat ini i yoosuk wa kiwa lai pure ye ki u chna pynwandur.
Kyntu ko leh ya ki wow lai ki chakhmat wei wow nang thooh stat chooh chooh neibhah ini ymtoh u kut du katni donhi yow ye ki u poi cha ka thong wei hajrong ini pynrap ko i kreh chitom wei yakrehlang man iwa emkaam tam.
Heijooh i por kyntu ko wow pynman neipor cheipor kam kani ka Exhibition najrong u ya chimbynta leh hapoh ka District, State wa National Exhibition neibhah deiwa leh kamni u yarap ko u nang krai chooh chooh i stat i tip.
Hawa kut da pynbna leh ya kiwa jop na jar jiar ki Department heiwa ha ka Automobile Engineering da yoh nyngkong ki 2023 Batch kiwa da chna da ka Electric Bicycle, hei wa ar da yoh ka 2019 Batch kiwa da chna da ka Electric Bike wei hei wa le da yoh ka 2022 Batch kiwa chna da ka 3 Wheel Electric Bike.
Naka Costume Design & Garment Technology Department da yoh nyngkong da u Mihsalan O-Iaki Dkhar, hei wa ar da yoh ka Rinayoodaka Dkhar wei hei wa le da yoh ka Sowaka Dkhar.
Na ka Architectural Assistantship Department won da yoh nyngkong u Andrew W. Lamin, wa ar u Deitre Laloo wei yei wa le da yoh u Mewanshanbok Niangti.
Discussion about this post