Ki wakreh ASHA hapoh yong ka Meghalaya ASHA Workers Union (MAWU), ynne sngi da mih paidbah ki da ki hajar ngut wow toor cha Secretariat yow dawa su ya ka nong yong ki naka sorkar kawa da sahkut la kamwa 2 snem. Tangwa neidaw wa em ka Dorbar Mang Tangka yong ka jylla da lai chong noh ki ha Madan Malki, Shillong.
Ki wakreh ASHA wa kiwa yarap da wan poi ki ynne ka sngi na kylleiñ ki bynta ka jylla wa kynthup na Khasi, Jaintia wa Garo Hills yow pynman ya ka yakhih kawa da sdang dei lai paidbah na pchem yong ka yung krehkaam ka MTC kawa em ha Khyndailad cha Madan Malki, deiwa rah lang wa ki Placard wa da thoh yei dawa wow su noh ya ka poisa wa sah wei wow pynku ya ka bai nong.
Ki ASHA da mih ki cha sarok ynne ka sngi wow dawa su noh ya ka poisa nadooh u snem 2020 wa toh u yoh noh ki wei wow dawa pynku noh ya ka bai nong naka T. 66 cha ka T. 300 chi sngi.
Kiwa yahkhmat yong ka MAWU da pyntip ki wa da dep phah yei thoh wow yachem ya u Montri ka chnat i chait i khiah, u James PK Sangm ynne ka sngi wei lada ym bien u Montri wow yachem, da maham ki wow lai toor bait cha Secretariat, wot hadooh wow sah miet syndon hakhmat katai ka thaw krehkaam wa heh dooh ka sorkar jylla lada ka sorkar ym ap ko yei dawa yong ki.
