Ynne ka 2 tarik ka sngi Musiang kawa man ka sngi wa le yong ka lehniam Behdieñkhlam ki khon ka Raij Jowai, da man ko kawa lai bait heiwa kiwa kitkaam niam da pynman ki yei yachem ha Mynkoipyrdi, Loompyrdi Iongpiah heiwa da wan chimbynta da ki khon na Kmairaij chirup wa ki heh yong ka Seiñ Raij heiwa da yoh i klam na u President ka Seiñraij, u H. Toi wa ki kyntien na u Dolloi ka Elaka, u Puramon Kynjing.
Manda kut ka yalang da lai ki cha Iawmusiang wow lai rah ya ki Dieñkhlam heiwa da chaad ha waroh ki thaw niam ka Raij kam ha Biar Ka Blai, ha Datlawakor, ha Madan Chaad Sukra wa kiwi kiwi ki thaw deiwa chimbynta da ki phaw hajar ngut ki khon ka Raij Jowai.
Hadien wa da pynpoi ya ki Dieñkhlam ha Madansiatthong, neliang ki Khonraij (Chiliangraij) da lai li thooh ki ya ka Khnong Blai na Loom Sooyung yow rah ya ka cha Madan Poh-Sawiar.
Ynne da sakhi wa ki manbei wa ki khynnah kynthai da synraan wei da pynphooh ki ya ka chaad niam heiwa da riam ki da ki sula wa miat chirup i ksiar i rupa.
Manda poi ha Madan Poh-Sawiar, u Dolloi da e u yei ngooh i dem heiwa da paan yei bha i miat yong waroh kiwa chong wa sah hapoh ka Raij wei da e kti u yei pyrnah Khnong Blai ha u Kñi ka kur Nikhla, u Borki Nikhla wow e u i ngooh i dem wa Ka Suit Ka Choor ha ka Khnong Blai yow e ngooh ya ka Bei Rymaw, ki Blai ki Syiem wei manda dep neini ki khon ka Raij da rah ki jar jiar ki Dieñkhlam.
Ya ki Dieñkhlam da rah nadooh na Madansiatthong cha Biar ka Blai wei hadien wa chaad neini da rah ya ki Dieñkhlam hadooh wa poi jar jiar ki chnong yow pynyieñ ya ki.
Ki Khonraij da rah won ki ya ka Khnong Blai wow pynpoi ya ka ha Madan Moosyiem, wa em haphrang ka Yungwalieh ka Chilliangraij.
Discussion about this post