Ynne ka sngi ki khon ka Elaka Sutnga hapoh ka lama yong ka Environment Coordination Committee da mih ki da ki hajar ngut cha ka lai paidbah wa jai-jai namo ka Peace Rally deiwa yachem chwa ha Chi-Kilo heiwa da yoh ya ki kyntien duwai na u Tbn. M. Suja.
I thmu wa pynman ya ini i lai paidbah wa jai-jai toh wow dawa pyndam noh ya ki 14 tylli ki karkhana Coke kiwa dang krehkaam hapoh ka Elaka hadien wa da ye wow pyndam ya ki 34 tylli, kattu won da dawa wow pyndam sa ya kini ki 14 tylli.
Hapyrdi ini i lai ki paidbah da rah ki chirup wa ki kot-rben wa thoh ya ki kyntien wow yada ya ka rymaw wei da beiñ ki leh ya ka sorkar jylla, ka JHADC wa kamjooh leh ya ki Montri ka sorkar jylla wei khamtam wow khang u pyndooh ya ki karkhana Coke kiwa em hapoh ka Elaka wei da lai luti ki deiwa jai-jai hadooh wa poi ha pchem ka yung krehkaam u Deputy Commissioner, East Jaiñtia Hills ha Khliehriat.
Manda poi ha yung krehkaam u DC, neiliang u President ka ECC, u Never Lamurong da pyntip u wa 34 tylli da khang ya ki karkhana, ynne won sa 14 tylli wa dang sah wow pyndooh pyndam noh, neibhah kini ki 14 tylli ki karkhana dei krehkaam ki daw hap wow yut chnong noh chawi.
Kawi na ki dkhot seiñ kynthai namo ka ECC Womens’ Wing, ka Ristina Nongtdu da khana ko wa i thang khiar ya u Coke da dooh ki ya ka la’ær wa pyngngaad wei da dawa ki wow yoh biang ya ka la’ær wa khooid.
Da ong ko wa ki tre kini ki karkhana wot kiwa emkti ha kini ki karkhana em bait ki payu para yong ki weileh ym pyrkhat ki ya ka mynried ka pateiñ hadien neibhah pyn na katni da sdang dooh ya u soh wa u khoo wei ki khynnah leh kiwa da chem chitom ki wow riñ mynsien.
U waheh chnong ka Lelad, u E. Bareh da pyntip u wa ka chnong yong ki toh kawa jan tam wa kini ki karkhana Coke wei u waheh chnong warim da e u ya ka NOC tooh heiwa da tyngkheiñ ya oo kam u waheh chnong ha u Naikhynde 2021. Da kyntu u ya ka sorkar wow pyndam noh ya ki 14 tylli ki karkhana Coke neibhah ka la’ær man ko kawa sih wei kawa ktah yei mynsien bru khamtam yong ki khynnah.
Kiwi ki waheh chnong kiwa da klam ha kani ka sngi da rai ki wow pyrchah bait ya kini ki karkhana wei wow khang wot ya ki 14 tylli kiwa dang krehkaam katni.
U Reading War uwa man kam uwa e buit ka ECC da ong u wa u Blai da kyrkhu u ya ki bru pyrthai le jait, na kini, i khyndaw ka um kini ar tyllli da man kiwa da sih, kattu won sa sah sadu ka la’ær kawa pynsah mynsien ya i ki bru.
Da ong u wa ki bru chemphang na kylleiñ ka ri wa na baar ri da ong ki wa lada pynkrehkaam du 5 tylli kini ki karkhana hapoh ka Elaka ym im de ki bru tæ katwon ktah pathan ko hawa em da ki 14 tylli ki karkhana? Deiwa kylli pynrap leh lada bien næ chah ki kurim wa ki khonki tre karkhana Coke wow booh ya kini ki karkhana hapoh ki chnong yong ki?
Ynne ka sngi neiliang ka ECC da e kti ko ya ka dorkhat cha u Deputy Commissioner heiyatoh wa ini i kaam wow pyndooh pyndam noh sa ya ki 14 tylli ki karkhana, wei neiliang u Abhilash Bharanwal da jubab u deiwa ong wa neidaw wa em ini i kaam hapoh ki yung kasari (Subjudice) wei lada ye ki wow yang waroh chi kattu emkaam wow yaichah sa chipor.
Heiyatoh won wa ka hukum ka High Court ya ka sorkar jylla wow pynbiang ya ka Action Plan hapoh ka 22 tarik, neiliang u Bharanwal da ong u wa emkaam wow man kiwa yaichah hadooh wa poi katæ ka sngi.
