Ynne ka sngi da ki hajar ngut ki paidbah na ki 13 chnong da wan ki cha ka yalang u Nehemayah Tyngkan u kyrtong ka Congress na Mowkaiaw Constituency ha ka yalang wa da pynman ha Madan Phutbol Mooblang, Iooksi.
Ki paidbah na ki 13 chnong kynthup ki ya ka Iooksi Iapkhla, Iooksi Umdeinlin, Iooksi Priang, Iooksi Tongkiad, Iooksi Kyanmynsar, Lakadong, Khonshnong, Nongrynkoh, Sarhen, Pohkseh, Madanrwai, Iawthymmei wa Saphai.
Neiliang u Ribok Biam hawa e ya i klam da ong u wa kam uwa chong chnong ka Saphai sñiaw sarong u wa mih u Nehemayah Tyngkan na kani ka thaaiñ weiwa man u u bru uwa da stat wei uwa em akor em burom.
Da ong u wa hanlada da yoh ya u sarok na Pyntei cha Saphai tangwa man u uwa stang wei lada ym yoh ya uwa mihkhmat na kani ka thaaiñ tæ ya boi ym em de wow chna pynmiat ya oo neibhah wa daw sih u pyn ha ki snem wow wan.
U Yul Sungoh uwa man u President warim ka UDP Saphai Unit hawa e yei klam da ong u wa lada yatylli tæ i jop da tikna tangwa lada ym yatylli tæ da man iwa kut ya kani ka thaaiñ.
Chooh chooh da ong u wa ha ki san snem wa da lai, u Nehemayah da kreh bait u khlem sangeh la hei sñiawsih næ sñiawbha da emlang bait u wa kiwa yoh wa khamtam kiwa duna hei yoh i laa.
Da ong u leh wa u MLA wa katni, u Nujorki Sungoh da mylliñ u ya ki khian tangwa da kreh u du ya kiwa yoh kiwa mahajon neibhah katwa Phone ya oo sa du i wym rap Phone u wei lada rap u leh tæ boonkaam u tangwa lada Phone ki mahajon mar ya Phone rap wot u.
Neiliang u Pynbait Passah hawa e yei klam da kyntu u ya ki paidbah wow kyrchaan ya u Nehemayah dei yatylli. Da ong u leh wa ka Mowkaiaw man ko kawa da sahdien tam khamtam ha i yoh i laa wa khamtam i chah thombor ha ki thaaiñ khappood.
U Wanpoi Lyngdoh na ka chnong Mowkaiaw da ong u wa ha u snem 2018 da kyrchaan u ya kawi ka Party tangwa ha kani ka kynti manda yoo u yei man u Nehemayah wei i maya ki paidbah ya u Nehemayah najrong wym em u ya ka poisa kam kiwi ki kyrtong na kiwi ki Party, kamtæ emkaam wow kyrchaan noh ya oo khnang wow wanrah ya ki kaam pynroi liang wanang hapoh ka Constituency.
Ha kani ka sngi da pdiang burom leh ya kiwa kitkaam warim ka UDP na ki chnong waphær waphær napoh ka Constituency wei da pynphooh ya ka da ki chaad wa kiwi kiwi.
