I joor u slap ha kini ki sngi da wanrah i yei oor khyndaw wa chyrkhei bha ha ka 17 tarik heipor kamwa 2:30 i step wei da sakhi yeini da ki bru wa sahmiet cha bri heiwa da ong ki wa da sñiaw lakam wa khih khmi hanla em ki rap jngai ini i thaw jia.
Ini i thaw wa jia toh iwa dang em hapoh ka Elaka Satpator hajan ka chnong Lumpyngngad wa Kharkhana wei ini i oor khyndaw toh iwa joor bha hadooh wym ye kheiñ de katwon tylli ki dieñ kwai kiwa antaad wa da em da ki phaw hajar tylli kiwa da chah tympat wei i khyndaw da ban i leh ya u pathi, saroo wa kiwi de ki mar rep ki wym chynna de wa da chah tlep.
Ini i thaw wa jia toh iwa mantre da ki 8 tylli ki manyung kitæ ka Embhah Shylla, ka Damayanti Shylladong, ka Akordor Lamare, ka Niti Pamblang, ka Hiltimai Shylla, ka Silent Shylla, ka Nishain Khongmawloh wei kini toh kiwa na chnong Kharkhana wei kawi won toh ka Miyo Tangsang kawa na chnong Lumpyngngad.
Hawa yoh u yaklam wa ki kattu katni ki tre thaw da ong ki wa ini i dooh yong ki toh kamwa dooh ya u dkhot yung uwa da khlaad syndet khlem da toh por neibhah ki im ja-kpoh ki deiwa rep kwai, pathi, sumurit, saroo, ladaw, satrooiñ wa kiwi de, wei da sñiaw ki wa da kut laad ya ki wow pyndap yeiwa emkaam ka yung ka sem, wow psa khon, u pynstat pyntip ya ki wei kattu da man ko ka dooh nong wa khroo wei da sñiaw diaw hawa pyrkhat ya ka mynstep ka mankawi ka yung ka sem wa ki khon ki kti.
Da ong ki leh wa i kyrmen kattu toh wow kyruiñ cha ka sorkar kamjooh cha u MLA ka thaaiñ, u Montri wa toh u pait yeini, u SDO wa u BDO ka Amlarem wow yarap ya ki yow pynyoh ya ki Scheme heiyatoh wa ini wa jia.
Ini i oor khyndaw da ktah ko leh wot ya u sarok PWD heiwa da baan i khyndaw i ktieh hadooh wym lait de ki kari u lai wei ha ka 18 tarik heipor kamwa 4:30 i sngi da wan ka pooh chi loom yow pynkhooid ya ini i khyndaw yow lait chooh ki kari u lai.
Kiwa chong chnong da ong ki wa lada ym sangeh u slap, daw em biang i oor khyndaw wei ini wa jia ha uni u sarok PWD toh iwa jngai du kamwa 400m na i thaw wa oor khyndaw.
Discussion about this post