Ka seiñ All Hynniewtrep People United Front (AHPUF) wa ka seiñ Confederation of Hynniewtrep People (COHP) ynnin ka sngi da lai yachem ki wa ki wakreh ka yungkrehkaam District Mineral Resources, Jowai wow thooh yutip na kani ka chnat wa ka sorkar da pynlait Challan ne ym em yow kit ya u mooyong hapoh ka ri-loom Jaiñtia. Heiwa da yoh yei jubab na katai ka chnat krehkaam wa ym em pynlait yaki Challan.
Kamtæ da kylli wa kammon wa da ki phaw hajar tylli ki truck kit mooyong won da yieñ laiñ ki ha tymbud u sarok yong ka ri-loom Jaiñtia yow lai cha Byrnihat, Beltola wa Guwahati, heiwa ki wakreh ym ye ki wow jubab da iwa biang, deiwa phah ya ki wow lai kylli naka Directorate of Mineral Resources, Shillong.
Kamtæ ki seiñ da ong ki wa ini pynyoo ko wa ka sorkar Meghalaya Democratic Alliance (MDA) wym chimkhia ko ya kani ka kaam khayi mooyong wa pyrchah yaka aiñ hapoh ri-loom Jaiñtia wa ka jylla hi waroh kawi, deiwa pynbaad wa ini pynyoo ko yei emkti lang nadooh ki montri wa ki heh sorkar kiwa da emkti ha kani ka kaam.
Da ong leh wa ka sorkar ym chimkhia ko wow pynlait yei tih mooyong hapoh ka jylla Meghalaya neidaw wa ki rap yoh nong ki cha ka kata yong ki deiwa leh tooh neibhah deiwa pynlait da ka Challan, ka poisa daw lai ko cha ka sorkar.
Ki ar seiñ da kam ki leh wa da leh ya kani ka khayi næ Challan mooyong deiwa su cha kiwa haneiñ hadooh kamwa T. 95,000.00 wa T. 100,000 nadooh na East Jaiñtia hadooh ha Byrnihat wa Guwahati, wei kiwon kiwon kiwa kwah wow khayi mooyong hap ki wow lai lyngba yong ki Dalal kini ki bru.
Da ong ki leh wa ha kini ki kajiak sngi ym tip kiyi wa yah bakla wei pynchlur ya ki paidbah wow ya kit mooyong wei katni won kamwa da yoo lang waroh wa da ki hajar hajar tylli ki truck da yieñ sahkut cha luti iwa da wanrah yei boon i eh wa i dooh nong ya kiwa khayi mooyong, khamtam ya kitu ki pli kiwa dooh wa duk.
Kamtæ neiliang yong kini ki ar seiñ da dawa joor ki yaka sorkar wa toh u thooh laad thooh luti ki wow pynlait noh smat yaka Challan khang wow yoh ya krehlang waroh, neibhah wa lada man kamni kat hadooh wa pynlait Challan da dooh lut u mooyong. Heijooh i por leh wow chimkhia u pynlait noh yaka kaam tih mooyong hapoh ka jylla khnang wa waroh ki paidbah u yoh ki wow ya tihlang wei yathied lang wei wow ya dai lang.
Kani toh katkam ka kyrwoh na u J. Phawa- President AHPUF, u B. Samaiang- President COHP wa u C. Sungoh-Secretary AHPUF.
