Ynne ka sngi ka yalap Election u kyrtong ka NPP na 1-Nartiang Constituency, u Sniawbhalang Dhar ha chnong Moopliang da man ko kawa chongchit heiwa da ki boon hajar ngut kiwa kyrchaan yong oo da wan ki dei mynsien wa maya yow pynchongchit ya ka yalang.
Ha kani ka yalang da psiah dkhot thymme cha ka NPP wa kynthup ya u J. Shylla uwa man kam u President wa u R. Dkhar kam u Secretary ka Congress Namdong-B.
Da ya emlang ha kani ka yalang wa ki waheh ka chnong Moopliang wei da yoh leh yei klam na u Waheh Chnong ka Moopliang uwa da yaroh yei kaam wa u Sniawbhalang Dhar da wanrah u hapoh chnong poh thaw.
Da yoh leh yei klam na u Asst. Waheh Chnong ka Moopliang wa u Waheh Chnong ka Moodymmai, u Joseph Pariat.
Neiliang u Sniawbhalang Dhar da e khublei u ya kiwa kyrchaan yong oo ha Moopliang wa pynyoo ki yei mynsien wa yatylli iwa da pynkmen ya oo hawa yoo u ya ki ha kani ka yalang.
Da e khublei u leh ya kiwa kyrchaan yong oo na waroh ka Constituency wa ym mutdur u hadooh katni da ki phaw hajar wow wan ya synraan lang ki chirup wa oo, wei ngiat u wa kat deini i wan ki yooluti u wow jop emburom biang ha kani ka kynti.
Da kyrpaad u leh ya kiwa kyrchaan yong oo ha Moopliang wa kamwa jooh kyrchaan borbah ki oo ha u snem 2018, ngait skem u wow kyrchaan emburom biang ki oo ha kani ka Election 2023.
