Kam chibynta wow pyntikna wa ki khynnah u yoh ki yei baam wa tei yei doh i pran, ka Society for Urban and Rural Empowerment (SURE) da sikai ki ya ki skur wow sdang da ki kpær skur ha ki thaw wa lait hajan ki skur. Wei ya ini wa thung ha ki kpær toh kiwa ye wow pynemkaam hawa chet ya i baam Mid-Day Meal.
I thmu kini ki kpær skur man ko leh wow sikai ya ki khynnah wow pynmyllien wow kreh ya ki kaam rep wei wow sñiawthooh yei kordor wa mih na kti yong idæ hi kamjooh yow pynyajan ya ki khynnah waka bei rymaw.
Kawi na ki skur kawa da lai chakhmat bha toh ka Cham Cham Wah SSA Lower Primary School kawa em haka chnong Cham Cham. Kani ka skur da sdang ko ya ka kpær ha skur nadooh u snem 2019 wei ya kani ka kpær skur da pait da yahkhmat da ka Yoona Dkhar kawa man kawa sikai ha kani ka skur. Wei hadien wa da ya kreh chitom katni da yoh wow kheit ya ki jhoor kiwa ki khynnah da thung hi ki.
Kini ki jhoor kiwa da yoh wow kheit katni toh kiwa da thung nadooh u Naichiphaw hadien wa da wai biang ya ki skur hadien ka Lockdown u 2021.
Ka Yoona Dkhar da pyntip ko wa da chet lang ya kini ki jhoor deilang wa i ja Mid Day Meal wei da yoh wow kheit ya u salad, yanem, mule, pathoo soo, mator wa kiwi kiwi.
Neiliang yong ka skur da pynkhreh ko wa lada jia wa em biang ka Lockdown, ya kini ki jhoor daw lai saam ki cha ki yung ki khynnah skur.
