U Montri Rangbah ka jylla, u Conrad K Sangma ynne ka sngi da saam u ya ki Cheque cha ki Co-operative Society ka Khasi wa Jaiñtia Hills ha ka yalang wa pynman ha State Convention Centre, Shillong deiwa emlang u Montri, AH & Veterinary, u Shanbor Shullai, u Principal Secretary, AH & Veterinary, u GHP Raju wa u Commissioner & Secretary, u Dr. Vijay Kumar.
Hawa e yei klam, u Conrad K Sangma da ong u wa da kylla i rukom pynlut poisa ka sorkar ha kiwa boon ki bynta deiwa ban joor yei emkaam wow man iwa krehkaam, iwa yoh myntoi wei wow pynmiat leh yei synchaar khadar. Da ong u leh wa emkaam wa kiwa chakri ha ka imlang sahlang, i chait i khiah, i puræ puthi, i chna baam, i ri mrad, ki kaam uiñke suwari emkaam wow chim kabu ki leh ya ini i e yarap ka sorkar yow myntoi kiwa em nadooh na tre dooh.
U Conrad da kdaw u leh wa hapoh ka jylla da baam 18,000 MT chi snem i doh sñiang wei na ini hadooh 10,000 MT toh iwa da wanrah na baar wei emkaam wow pyndap ya ini i duna deiwa pynmih pyn hapoh ka jylla. “Ka yaw toh kawa da em chwa, kamtæ toh u chim kabu ya ini deiwa e yarap ya ki bru wa em ha ini i khih, ki wow yarap kylla won ya ka jylla wow pynmih poisa”. Da kular u leh wow e yarap cha ki 12 tylli ki thaw ri sñiang namo ki Pig Breeding Center wa em hapoh ka jylla.
Ka Milk Mission toh kawa da yarap poisa da ka National Co-operative Development Society deiwa mang poisa T. 215.48 klur kawa da man kawa heh dooh ha ka thaaiñ North East India wei daw myntoi ki 2000 tylli ki manyung wei da e ya ka ram wa T. 12.20 klur cha ki 40 tylli ki Co-operative Society ka jylla.
Hapoh ka Piggery Mission da e ya ka ram cha ki 100 tylli ki Co-operative Society kawa da poi T. 18.53 klur.
