Jowai : Ynne ka 12 tarik ka sngi wa ar wa yoh ki bru u kylliang poisa T. 500 wa T. 1000 kamjooh wow sai poisa hapoh ka jylla Meghalaya, ha Jowai da sakhi wa nadooh i step hadooh janmiet ki bank kam ka SBI wa ka UBI ha Jowai toh kiwa boonkaam dooh na waroh.
Ha kiwi ki bank leh boon kiwa wan kylliang poisa tangwa ka poisa toh kawa smat lut wei kawa haap ma haap u lithooh na ka bank UBI kawa pynbiang poisa ya ki bank ha Jowai.
Ha ka bank Meghalaya Co-operative Apex Bank, Ladthadlaboh du ha chiteiñ sngi ynne da dep thap poisa ki bru hadooh T. 2 Klur ini leh da man i jooh ha kiwi ki tnat bank tangwa tam ka SBI heiwa da poi ka poisa da ki phaw klur.
Ha waroh ka ri hadooh ynnin ka 11 tarik ha SBI da thap poisa ki bru hadooh T. 39,777 klur, ha ka 10 tarik won yoh ko T. 22,150 klur. Da yooluti leh wa kiwi ki bank u yoh ki T. 5.07 klur.
Cha i cheini won boon ki bru kamwa jooh myllien ki neipor yong rim kam cha ki chnong nongkyndong hadooh ha sor jooh booh poisa ki cha yung wei katni da sdang ki u hær-rngu wei da sdang ki u mih wow thap ya ki poisa cha ki bank.
Em leh kiwa ong wa heipor wa sñiaw ki chaphang u Aadhaar Number deiwa tieñ ya uni u number kamjooh leh boi daw tip ka sorkar ya ka poisa wa em ha Bank Account da sai lut ki ya ka poisa yong ki.
Ha kiwa boon ki dukan won ong ki wa, ym em kyntait ki ya ka poisa wa su ki bru da ka T. 500 wa T. 1000 tangwa da joor i duna khutia da sdang ki u dam u chim ya ki.
Ha Jowai kiwa boon ki ATM toh kiwa dang khang, wei ha ki bank lada kwah u sai poisa, boon kiwa e T. 1000 hadooh T. 2000 donhi hanlada ong ka RBI ye u e hadooh T.4000 neidaw wa duna ka poisa.
Em kiwa ong wa yoh hi ki u sai T. 10,000 lyngba ka cheque. Kam wow pynkynmoo heini mynstep ka sngi bibar leh daw wai ki bank waroh.
Discussion about this post