Jowai: Ynne ka sngi ki chipai ka BSF hapoh i yahkhmat u DIG yong ka hapoh ka jylla u DP Tokas da saam ko ya ki kor wow chna pliang wa kyllung da ki sla dieñ kwai ha ka yalang wa pynman ha BOP Kuliang, EJH.
Ha kani ka sngi da em u 2 IC ka 19 Bn u DT Haokip, 2 IC 19 Bn BSF u B Singh, u Staff Officer DIG u M.E. Zingkhai, wa kiwi kiwi.
Ya kini ki kor da e sñiawbha wei daw booh ya ki hapoh kani ka BOP heiwa ya ka bordiñ daw e mynkna da ka BSF.
Kani toh ka sien wa nyngkong wa e sñiawbha ka BSF da ki kor cha ki paidbah wow pynemkaam ki mynkna wei da phah chna kyrpang leh ya ki nadooh na Bangalore.
Ya kini ki kor u booh hapoh kani ka BOP wei daw kyrriah ya ki cha kiwi ki chnong kamwa 2-3 bnai hadien kam cha Lejri, Huroi wa kiwi ki chnong wa em ha kani ka thaiñ.
U Zingkhai hawa e i klam ha kani ka yalang da ong u wa deiwa em kini ki kor daw yarap ko ya ki paidbah wow chna pliang hawa em i baam-doh yonglang, i khawai wa kiwi kiwi.
Da ong u leh wa ye u kamai ja-kpoh lyngba kini ki kor deiwa dai ya kini ki pliang, cha ki yaaw ki hat wei ki mar wow chna ya ki man ki kiwa mynkna neibhah kini ki sla toh kiwa haap wei mih hi-eh.
Neiliang u Haokip da ong u wa ka BSF daw pteiñ ko wow e i yarap cha ki paidbah ka thaiñ wow wanrah i yajan hapyrdi kini ki arliang.
U waheh chnong ka Borsora u Dringson Lamare hawa e i klam da e yaroh u ya ka BSF wa da e yarap ko chiboon ya ki paidbah ha ki thaiñ khappood deiwa kyntu ya ki wow pynneh ya kini ki kor hapoh kani ka thaw.
Kiwi ki waheh chnong kiwa da em ha kani ka sngi toh u waheh chnong ka Umkiang u Ali Lamin, u waheh chnong ja Lahalein u Phyrai Dkhar wa kiwi kiwi.
Discussion about this post