Kiwa ha-yung ha-sem deilang wa ki pulit da hiar ki cha ka chnong Nongbsap, East Khasi Hills yow thooh ya ki ar ngut ki chi jur kiwa da wiar na ka chnong Marbisu, ini i hiar yong ki cha katai ka chnong toh hadien wa kiwa chong chnong da yoo ki ya kini ki ar ngut ha katai ka thaaiñ.
Ki ar ngut toh kiwa da tip kam u Wanboklang Kurbah (20 snem) uwa na ka kyntoit Traw Saitkhlieh waka Phibankyntiew Sun (18 snem) kawa na Marbisu kiwa da wiar na yung nadooh ka 20 tarik uni u bnai.
U Wanboklang da wiar u heipor 5:30 waje i janmiet wei da yoo khaddooh ya oo ha u sarok By-Pass ha Traw Lwai. Katwa ka Phibankyntiew da wiar ko heipor 4:00 waje i janmiet ha katai ka jooh hi ka sngi, wei neiliang kiwa ha-yung da lai ki wow pyntip yeini cha ki pulit ka Mawngap Police Station.
Hadien 9 sngi wa kini ki khynroo khyllood da wiar ki na yung, kiwa ha-yung da yoh khubor wa kini ki ar ngut da em ki ha ka thaaiñ Weilyngkut wa Nongbsap, kamtæ ynne ka sngi nadooh i por step kiwa ha-yung ryngkat wa ki pulit da hiar ki cha katai ka chnong yow thooh ya kini ki chi jur, tangwa ym chem ya ki hadooh wa noh ka sngi iwa da pynman ya ki wow liwan thylli.
Katkam wa khana yong kiwa ha-yung, da em wa yoo ya waroh ar ngut ha katai ka thaaiñ nadooh ynnin ka sngi heipor miet wa lai thied baam ki na Weilyngkut, wei ynne i step da yoo biang ya ki ha kawi ka lyngkha kawa em ha kawi ka khloo ha ka chnong Nongbsap wei neiliang kiwa chong chnong da lai pyntip ki cha kiwa ha-yung kiwa da poi ryngkat wa ki pulit.
Ynne ka sngi da em i ya thooh wa joor ya kini ki chi jur ha katai ka khloo kawa em chapoh synrang wei ki pulit da wan poi ki leh na Shillong ryngkat ki ksaw ka K-9 Unit yow phah syu wei da pynemkaam leh da u Drone yow pynhær wei riñdur ya katai ka khloo tangwa ym chem ki kini ki ar ngut.
Discussion about this post