Ka seiñ FKJGP Nangbah Unit dang du hapoh soo bnai wa da sdang ya ka, ynne ka sngi da saam ko da ki kynmor cha ki manyung ha ka yalang wa da pynman ha Madan Bir.
Ya kani ja yalang da pynlai da u Vice President ka seiñ u Wikliphi Sungoh uwa khana wa hawa e yei klam da ong u wa ini i saam kymmor ymtoh i leh Election tangwa iwi na ki kaam wa bha wa leh ka seiñ.
Da khana u leh wa ki pyrtuid ki bru wa yoh kymmor ymtoh wa da jied da ka seiñ tangwa da jied ya ki da ki Secretary ki 14 dong ka chnong.
U Waheh Dong Mukoisyiem, u Meyoowan Pasi da ong u wa dap i mynsien wa khroo ya ka seiñ wa da pyrkhat ko neibynta i bha i miat neibynta ki khon ka chnong. Da kitbok u leh wow dang ye ki wow pteiñ ya ki kaam wa bha neibynta ka imlang sahlang.
Da kyntu u leh ya kiwa yoh myntoi wow pynemkaam hok ya ini i e sñiawbha ka seiñ.
Neiliang u President ka seiñ u Moonevershine Dhar da pyntip u wa da seiñ ya ka Nangbah Unit ha ka ha 24 Naiynñiaw wei du hapoh soo bnai da ye wow yarap kamni wei yooluti sam chaphrang daw ye chooh wow e yarap cha ki paidbah.
Da ong u wa lada em i jia wa sñiawsih ye ki paidbah ka chnong wow pyntip cha ka seiñ khnang wow ye u leh yeiwa emkaam deiwa paan leh yei kyrchaan na ki paidbah ha ki kaam ka seiñ.
Kiwi kiwa da klam ha kani ka sngi toh u Secretary ka Dong Iawmusiang, wa kiwi kiwi.
