Ka Ephphatha Society kawa man ka seiñ wa kreh wei pait ya ki bru wa man kyrpang wa em duna hei doh i pran haka thaaiñ East Jaiñtia Hills District neibynta u pynyoh ki laad yarap waphær waphær, ha ka 22 tarik da chim ko yaka laad wow lehkmen Advance Christmas deilang wa kiwa em duna hei doh i pran ha yung krehkaam yong ka wa em ha Moowakhu Dkhiah West, East Jaiñtia Hills District.
Haka yalang tbian wa pynlai da u Rev. E.S. Sapuh, Director Ephphatha Society, da pynsñiaw haroh u yei lai luti kani ka Society kawa da seiñ ha u snem 2020 wei kawa da em katni kamwa 60 ngut ki dkhot.
Khana haroh u wa najrong wa pynyoh yarap ya kiwa duna hei doh i pran, kamwa man kattæ da sdang haroh ki sa ka chlem e sikai heiyatoh wei kaam thaiñ, kaam soor deiwa pyrkhat yow ye ki u yieñ hei yong ki i kjat neibynta u im ja-kpoh.
Neitæ won da sdang haroh ki saka chlem e sikai heiyatoh wa i tem i put.
Neiliang u Rev. Fr. Ebormi Lamare hawa e yaka khubor Christmas ong u, ka Christmas toh ka por yong i pynim, wym phær la biang næ duna hei doh i pran leh tangwa i pynim toh iwa kongsan tam.
Neitæ ka Christmas toh leh ka por yong i kmen neibhah wa da yoh yei pynim, wei ha kam ini i por u Blai leh da phah u ya u khon yong oo.
Hawa kyruiñ won u chei man i im kam ki bru ong u boonsien wot ki bru wa biang hei doh i pran leh em ki boon i duna la heiyatoh ka ktien thylliej, ka burom akor wa kiwi. Wei u Blai wym em e sap u du ya kiwa biang i doh i pran tangwa wot ya kiwa duna leh neibhah em ki ka sap wa rap tam bar ya kiwa biang i doh i pran.
Ha kani ka sngi neiliang ka Society da e sñiawbha Christmas haroh ko da ki kymmor waka bai kari cha ki 24 ngut kiwa duna hei doh i pran kiwa da wan na kiwa boon ki chnong cha kani ka yalang.
Hadien wa dep ah ya u Cake da kyrkhu pynwai yei lehkmen da u T.Bn. D.H Rymbai.
Discussion about this post