Ynne ka sngi ka HYC Padu Unit da e kyrchaan sñiawbha ko cha ki manyung wa emkaam yarap hapoh ka chnong Padu da ki kymmor hei emlang u Doctor wa pait ya ka Padu State Dispensary, u Dr. Arwin Khonglah kam u kongsan, u President ka HYC War Jaiñtia Circle wa u Secretary ka chnong ka Padu Bah.
U Dr. Khonglah hawa e yei klam da dap u dei sñiawngooh ya ka seiñ wa da yaleh ko wow e kyrchaan cha ki manyung wa emkaam yarap hapoh ka chnong deiwa kitbok ya ka seiñ wow kreh chitom chooh chooh ko wow kreh neibynta i bha i miat ka chnong ka thaw.
Neiliang u Secretary ka Chnong Padu, u Stelin Mukhim da dap u dei kmen wa ka seiñ em ko ka thong wow kyrchaan ya ki manyung wa emkaam yarap heiwa da e u leh ya ki kyntien sneiñ kyntu ya ka seiñ.
U President ka HYC War Jaiñtia Circle, u Yoodahunki Shylla da kyntu u ya kiwa chong chnong wa emkaam wow man ki bru kiwa yatylli ha ki chnong ki thaw khnang wow ye u kyntu kynrong ya iwa bha liang wanang.
Da ong u wa katni da em ki bru wa chim kabu kiwa kwah wow yah bakla ya ki paidbah ka thaaiñ, deiwa kyntu ya ki paidbah wa ymtoh wow elaad ya kam kitæ ki bru wei kam ka seiñ daw wan ko chaphrang wow yakhun pyrchah ya ini.
Kiwi kiwa da klam ha kani ka sngi toh u Dikermi Mukhim, u President ka HYC Padu Unit wa kiwi kiwi.
