Ka Rotary Club Jowai da e yarap ko da ki kymmor cha kiwa chah sumaar ha ka Halfway Home kawa em ha Sabahmuswang, West Jaintia Hills kawa man ya thaw sah ya kitu kiwa chitom hei bor pyrkhat pyrdaiñ wei da pynlai ya ka da ka SURE kawa man ka NGO na Jowai wei yeini da leh ha ka 26 tarik uni u bnai deiwa emlang u President wa u Vice President ka Rotary Club Jowai.
U Dr. H.H. Mohrmen, Secretary ka Society for Urban and Rural Empowerment (SURE) hawa e yei klam da khana u ya kiwa boon ki kreh wa da leh ki wei ini i pynkrehkaam ya kani ka Halfway Home toh iwa khor dooh na waroh.
Ka Niwanka Shylla, Project Coordinator kani ka Halfway Home da khana ko wa ka Supreme Court da phah ko ya ka sorkar pyrdi wow wanrah ya ki kyndon kammon wow yarap ya kini kiwa chitom kiwa da pteiñ u sahkut ha kiwa boon ki Mental Hospital wei da khana ko leh wa ha kani ka Halfway Home em ko yei thaw neibynta 25 ngut tangwa kamwa man kattæ dang ye ki wow pait du ya 12 ngut donhi.
Neiliang won u Rotarian S.K. Lato, Vice President ka Rotary Club da yaroh u ya ka SURE yeini i kaam wa da leh ko wow chakri ya kitu kiwa em i chitom hei pyrkhat pyrdaiñ wei sñiawkmen u wa yoh u e yeini i yarap ha kani ka sngi kamjooh leh u President ka Rotary Club, u Rotarian Deibormi Toi hawa e yei klam da e u yei yaroh yaka SURE yeini wa da leh ko deiwa kular leh wa ka Rotary Club yarap ko katwa ye ko ya kitu kiwa emkaam yarap.
Ka Rotarian E. F. Gatphoh, Charter President ka Club won da e mynsien ko ya kiwa kreh wa da kreh chitom wow pynman yei rukom im kini kiwa chitom iwa rap bha rap miat, kamtæ da kyntu ko wow pteiñ yeini i chakri yong ki dei mynsien wa maya.
Discussion about this post