Ka Khasi Student’s Union (KSU) ynne ka sngi da lehkmen ko yei dap 45 snem i lai luti yong ka wei ha kani ka sngi da pynlait paidah leh ya ka ‘Documentary Film’ kawa pynyoo ya i yakhun wa i yachem ka seiñ nadooh u snem 1978.
Ya kani ka lehkmen da pynman ha u Soso Tham Auditorium heiwa emlang u heh warim ka seiñ wa kamjooh kiwa yahkhmat ka seiñ wa katni nadooh u President, u Lambokstarwell Marngar, u General Secretary, u Donald Thabah wa kiwi kiwi.
Hawa klam ha i yachemlang, u Lambokstarwell da phah u da ka khubor wa khor cha ka sorkar deiwa ong wa lada ka sorkar thmu ko wow tih Uranium emkaam wow sai chwa ya u klongsnaam yong oo wa ki dkhot kamjooh ka jaitbru, lada ka sorkar thmu ko wow wanrah ya ka luti rel, pynkrehkaam chwa da ki aiñ wa dawa ka seiñ wei lada ka sorkar yaleh pyrchah ko ka seiñ ym yohsa ko wow leh ya ki kaam kamwa da jia ha u 2017 da iwa rap chyrkhei chooh chooh.
Heiyatoh won wa i dawa Inner Line Permit (ILP) wa i tipmit ya ka ktien Khasi ha ka 8th Schedule, u Lambok da ong u wa ka ILP da angnood wow pynkrehkaam da boon snem wei hadooh u snem 2019 ka sorkar da pdiang ko ya ka Resolution wow dawa pynkrehkaam ya ka ILP, tangwa sñiawsih won wa hadooh katni dang sahteiñ i ha nongbah Delhi kamjooh i thap ya i ktien ha ka 8th Schedule ka Constitution ka ri.
