Jowai: “Ki tiar wa T. 3.50 lak da ye u dai sadu T. 1 lak wei i doohnong man i hadooh T. 2.50 lak,” da ong ka Mila Nongjngi, na Thangrain kawi na kiwa dai jhoor ha Iawthymme, Jowai heiyatoh wa ki mar wa da pyud ki yong ka kam ki sapdok, baingon wa u kubi.
Da ong ko leh wa u baingon uwa 20 churia da sepai u khlem dai, u sapdok 3 ton wa u kubi 8 ton wa sepai deiwa kyntu ko leh ya ka sorkar wow thooh laad thooh luti tang wow khai ka tre.
Kani ka Lockdown wa 21 sngi wow yakhun pyrchah ya ka khlam u COVID-19 da ktah ko ya kiwa boon ki bru khamtam kiwa khih mylla sngi, wei ynne ka sngi won da yoh u sakhi sa yei chah ktah kiwa dailang (Wholesale) ya ki jhoor ha Jowai.
Ha Iawthymme ynne da sakhi ya ki jhoor wa pyud nadooh ki kubi, sapdok, baingon, wa kiwi kiwi.
Sa kawi kawa dai jhoor, ka Rina Marbaniang, na chnong Marbaninag Umseiniong da ong ko wa i doohnong man i iwa boon neibhah wymye u dai ya ki mar kamwa jooh nachwa.
Da ong ko leh wa da phah wow wan dailang tangwa man i iwa eh wow ye u dai waroh neibhah wa da ye u dai du chiteiñ ki mar wei ki dukan chibet da wai chibet da khang.
Neiliang ka Rosemary Nonghuloo, na Jowai da pyntip ko wa ka bai kari katni da ku ko le chah hawa pait wa kini ki por wa dadep wei ki mar chisien wa da neh ki da sih ki wei ymye wow dai palat yei dor ya kam kini ki mar ki wym neh.
Da pyntip ko leh wa katni neidaw wa khang chnong man i iwa eh wow pynlai ya ki mar neibhah du hapoh Jowai ymye wow pynlut ya ki kamwa jooh.
Kini kiwa dai jhoor da kyntu ki leh ya ka sorkar wow kyruiñ cha ki wow thooh ya ki laad yarap neibynta yong ki kam ha kini ki por wa chem chitom ki.
Discussion about this post