Ka Pasadwar Cluster Sports Meet kawa 14 da poi noh ko cha wakut kawa da pynman ha chnong Kamsing ha ka 15 wa 16 tarik uni u bnai. Kani ka lympung man ko kawa rap phær heiwa ki khynnah skur, kiwa sikai wa ki paidbah hap pynemkaam ki da ki lieñ ha i lai i wan lyngba ka wah Myntdu (Tisang) wow poi cha ka chnong Kamsing neibhah kani ka chnong man ko kawa ympu em sarok kari wei em ko ha khappood wa ka ri Bangladesh.
Ha kani ka lympung da wan chimbynta da ki 9 tylli ki skur heiwa 6 tylli toh ki Lower Primary School wa 3 tylli ki Upper Primary School na ki soo tylli ki chnong kiwa haap hapoh ka Pasadwar Cluster, kitæ toh ka chnong Pasadwar, Lumpyngngad, Kharkhana wa ka chnong Kamsing.
Ha kani ka lympung wa ar sngi da em chiboon ki yalehke wei da wan wai ya ka da u General Secretary ka chnong Kamsing, u Augustine Pamblang ha i emlang ki waheh chnong, kiwa sikai, ki khynnah wa ki paidbah.
Da saam leh ya ki khusnaam cha kiwa jop ha ki bynta waphær waphær wei ya i naam Best March Pass na ki skur Upper Primary da yoh da ka Kharkhana UP School. Haka kyrdan Lower Primary da yoh da ka Pasadwar Govt. LP School. Yei naam Best Discipline da yoh da ka Kamsing LP School, wei ha ka yalehbol neiliang ki chynrang na ki Upper Primary School da rah da ka Kharkhana UP School, neiliang ki kynthai won da jop da ka Pasadwar UP School. Na ki skur Lower Primary won neiliang ki chynrang da rah da ka Kamsing LP School wei neiliang ki kynthai da rah da ka Kharkhana Govt LP School.
Da e leh ya i naam Best Athlete ya ki soo ngut ki khynnah kiwa paaw bha ha ki yalehke, heiwa neiliang ki chynrang na ki UP School da rah da u Sumon Tudu uwa na ka Kharkhana UP School, neiliang ki kynthai na ki UP School da yoh da ka Daiomika Shylla na ka Pasadwar UP School, na ki khynnah Lower Primary won neiliang ki chynrang da rah da u Federation Swer na ka Kamsing LP School na ki kynthai won da yoh da ka Kobita Tati na ka Kamsing LP School.
