Ka Darrang Tourism Promotion and Development Society deiwa ya krehlang wa ka Tour Operators Association of Meghalaya, deiwa yoh yarap lyngba ka sorkar jylla, da yoh ko wow e sikai neibynta kiwa kiñ lien wa kiwa kreh kam kiwa yah luti namo ki Guide ha Darrang Tourist Spot.
Kiwa wan e sikai toh kiwa na ka LifeSaving Mumbai kiwa da pliah ha kani ka kaam heiwa da e sikai neibynta ki 34 ngut kiwa da jied kyrpang na ka chnong Darrang, yow pynbniah yeiwa e yarap ya kiwa wanke lada jia ha i ngam um lane ha kiwon kiwon ki jia wa mynsoo kiwa emkaam yarap da iwa jhan.
Kini kiwa chah sikai da yoh ki chiboon ki yutip wa i stat wow yarap ya ki bru kam ha i ngam um, wa oor wa haap, kiwa chah tyrrah kari wa kiwi kiwi. Da yoh leh ya ka sikai wa kyrpang wow leh yaka CPR (Cardio Pulmonary Resuscitation) hawa em kiwa emkaam. Nadooh kattu, ha Darrang Tourist Spot da em ko ki wakreh kyrpang wow e yarap hawa em iwa jia wa emkaam yei yarap kiwa tip kam ki Lifeguard wei ki paidbah ye ki wow khut ya kini ki wakreh lada emkaam hawa wan ki cha Darrang.
U Reachingson Kongwang, Chairman ka Darrang Tourism Promotion and Development Society, da ong u wa man iwa kmen wa khroo wa ka chnat Tourism ka sorkar jylla da ap ko ya i kyrpaad ka Society yow e ya kam kini ki jait sikai ya ki khon khynroo ka chnong kiwa kreh ha ki kaam yah lieñ wa ki Guide ha Darrang Tourist Spot khamtam wow yoh sikai ha chnong idæ wei iwi i kyrpaad neiliang ka Society ya ka sorkar lyngba ka chnat Tourism toh wow yarap da ki tiar ki tar (Life Saving Materials) kam ki Life Jackets, Spine Board, Wheel Chair, ki Saving Bag, ki tylle wa kiwi kiwi kiwa emkaam hawa yatoh wa ini i e sikai, khnang wow ye sakhiat wow yarap ya ki paidbah ha i por wa em i jia mynsoo lane ngam um.
