Kam chibynta wow pynsñiawthooh yaka National Tuberculosis Elimination Programme kawa man ka thong wow pyndooh jait yaka kjut TB deilang waka Scheme thymme wa tip kam ka Pradhan Mantri TB Mukt Bharat Abhiyan (PMTBMBA), neiliang ka yung krehkaam ka District Tuberculosis Officer, Jaiñtia Hills deiwa ya krehlang waka Star Cement Limited, Lumshnong hapoh ka CSR kani ka karkhana, ynne da saam baam hapoh ka Community Support Scheme for TB Patients ha ka yalang wa da pynman ha Sutnga CHC, Sutnga deiwa emlang ka District Tuberculosis Officer, Jaiñtia Hills, ka Dr. E.B.V. Laloo, ka Medical Officer In-Charge Sutnga CHC, ka Dr. R Toi, u Manager-CSR, Star Cement Limited, Lumshnong, u Kingshok K. Borah wa kiwi de.
Ka Dr. E.B.V. Laloo hawa e yei klam da khana ko kammon wow leh pyn hapoh yung yow yada nei poor i kjut Tuberculosis cha kiwi wei da kyntu ko leh ya kitu kiwa chitom wow dih tista ki yei dawai wei da khana ko leh ya kiwa boon ki laad yarap wa ye u yoh kiwa chitom TB hadooh i yarap poisa heipor wa dih dawai ki.
Da e khublei ko leh ya ki bor pynlai ka Star Cement Limited wa da pynyoh ki ya kini ki mar baam wei da khut ko leh ya kiwa chong chnong wow ya krehlang ki wa ki ASHA kamjooh ki Health Centre wa em chajan ki chnong ki yow pyndooh jait noh ya kani ka kjut.
Neiliang u Kingshok K. Borah da khana u chaphang kiwa yoh TB deiwa ong wa ka Star Cement toh kawa da rai kut wow e yarap katwa ye ko cha kiwa yoh TB wa em hapoh ka East Jaiñtia Hills District.
Kiwa de kiwa klam toh ka Medical Officer In-charge Sutnga CHC, ka Dr. R. Toi, u Senior Tuberculosis Laboratory Supervisor (STLS), u Watson Siangshai wa u Senior Treatment Supervisor (STS), u Linus Manner.
Hadien kani ka yalang da saam ya ki mar baam wa kynthup ya u khoo, i phñiang baam, ki pylleiñ wa kiwi kiwi de kiwa da e cha palat 30 ngut kiwa kjut TB kiwa da emlang ha kani ka sngi.
Discussion about this post