Ha ka step 28 tarik i diñ da sdang kop i ha u loom Shirui Peak, Ukhrul District, Manipur wei neiliang u montri rangbah ka jylla, u Biren Singh da yaklam u wa ka sorkar pyrdi wow e yarap wow tymplæh ya ini i diñ.
Neiliang ka Indian Air Force da phah ko ya ar tylli ki Mi-17V5 helicopter ha kiwa da pyndait ya ki Bambi Bucket wow yarap tymplæh ya ini i diñ.
Hadooh ynnin ka sngi ini i diñ dang man i iwa kyr’ooh bha wei ki bru na ka chnat Forest wa na ka Disaster Management da em ki ha ini i thaw wow tymplæh ya i diñ.
Kam wow pynkynmoo heini, ki chpai ka Indian Army, Indian Air Force, National wa State Disaster Response Force, da yaleh ki yakhun ki wow tymplæh ya i diñ ha Dzukou Valley ha khappood Nagaland-Manipur iwa da neh hadooh kamwa ar tayaw.
