Jowai : Ha kani ka sngi chohthat 6 tarik uwi u bru samen u Nehemayah Tyngkan wa na ka chnong Yooksi uwa man leh kam u Branch Manager ka Birla Sunlife Insurance Jowai da li e yarap u ya ka thaw ri khon-swet ha Sahsniang deiwa e 16 tylli ki palong waka poisa.
Heini i lai li e yarap u Nehemaya Tyngkan ya ki khon-swet wa pait da ka North East India Mission Association NEIMA ha Sahsniang, da em chwa ka yaseiñ duwai heiwa da yoh i rwai, i puræ na ka ktien u Blai wei duwai won na ki khonswet, da yoh i klam na u Pro-pastor EM Passah uwa man leh u Secretary ka NEIMA Unit Sahsniang, i sneiñ kyntu ya kini ki khynnah khonswet na ka kong L. Sungoh, kamjooh da yoh i rwai wa pynlung mynsien ya kiwa emlang na ki khynnah khonswet ka NEIMA.
Hadien wada kut ka yaseiñ duwai da em won ka yalang wa tbian wa pynlai da u khynroo J. Lathong.
U Tbn.L. Tang Chairman ka NEIMA Unit Sahsniang hawa e ya ka parom tbian kani ka thaw ri khonswet ong u, ya kani ka NEIMA da sdang ya ka ha u snem 2004, heipor wa sdang da pynsah ha ka wi ka yung wa e sñiawbha da ka wi ka manbei wa na Sahsniang.
Da khana haroh u yei lai luti yong ki kam kiwa pait wa pyllai wei da chem ki boon i eh i kho iwa tein tein jooh pyndooh mynsien ko ya ki hawa duna i yoh kyrchaan ki na ki paidbah neidaw wa boon i pynlut ki, la kammon kammon 30 hajar chibnai haap ki u pynlut ya ki, kiwa khynthup nadooh i baam, i bai skur, i bai kari ki khynnah man ka sngi kiwa da haap u lai skur cha Mowkaiaw.
Kamtæ pynsñaw u i sñiawngooh ya kitu ki para bru wa jooh wan noh kyllooid mynsien kat khon wa yoh ki man u bnai na kiwa wan yarap man u bnai iwa yarap u pyndap yei wa emkaam ki man u bnai.
Da pynbna haroh u kamwa man katni da pynkhreh ki u chna sa kawi ka yung yow pyn chong jar jiar khynthai wa ki chynrang neibhah da ya heh ki.
U ma Nehemayah Tyngkan hawa e i klam ong u i daw wa pynman ya oo wow wan yooh kjat ha kani ka thaw ri khonswet toh wa em u ka mynsien yarap cha kiwa emkaam yarap
Discussion about this post