Jowai: Ka mukotduma PIL wa yaleh u Manoranjan Roy, RTI Activist ha ka Bombay High Court daw chong bichaar ya ka mynstep ka 12 tarik kawa da yaleh nadooh ka 12-02-15.
U Roy lyngba ka jubab RTI wa da yoh u naka RBI neibynta u snem 2000 hadooh u snem 2011 da chem u wa ym biang ki kot poisa deilang wa ki T. 500 wa T. 1000 warim kiwa pynmih na ki thaw chon poisa ka sorkar India kiwa em ha Nashik, Sewas wa Mysuru.
Katkam wa chem ha ka RTI kini ki thaw chon poisa da chem wa ki kot poisa T. 500 da chon 19,45,40,00,000 tylli kiwa phah cha ka RBI tangwa ka RBI won da ong ko wa da yoh ko 18,98,46,84,000 tylli iwa duna 46,93,16,000 kiwa da kynjoh T. 23,465 Klur wa wiar.
Ki thaw chon leh lyngba ka RTI da pyntip ki wa da chon ki 4,44,13,00,000 ki kot T. 1000 warim tangwa ka RBI da yoh ko 1,17,00,000 tylli kiwa chongdor T. 1,170 Klur.
Ha kawi tawon ka RTI nadooh u snem 2000 hadooh u snem 2011 ka Bharatiya Reserve Bank Note Mudran Pvt. Ltd. da pyntip ko wa da phah ko 13,35,60,00,000 tylli ki kot poisa T. 500 warim wa 3,35,48,60,000 tylli ki kot poisa T. 1000 cha ka RBI tangwa ka RBI won ym bien ko jubab lada yoh ko namo ym em ya kani ka poisa da ong u Roy.
Ha ka PIL, u Roy da pynmih pyrtuid u Montri Rangbahdooh ka ri, ka Finance Ministry wa ka Ministry of Home Affairs kam kiwa embynta ha kani ka kaam.
Neiliang u muktiar u Additional Solicitor-General of India, Anil Singh, da phah u ya u Roy wow pynwiar noh ya i pyrtuid u PM, FM wa MHA.
Ya kani ka PIL da pynkut ya ka ha ka 23-08-16 khlem da bichaar bniah ya ka. Kamtæ neiliang u Roy yow pynim biang ya kani ka PIL leh u da ka Review Petition (No. 5/2016).
U muktiar u Roy u Shashikant Chaudari da ong u wa 75 sngi hadien wa pynkut ya kani ka PIL ha ka 23-08-16 u Montri Rangbahdooh ka ri u Narendra Modi da pynbna u ya ka Demonetisation wow pyndam noh ya ka T. 500 wa T. 1000 warim wei da e daw u wow pyndooh ya ka poisa Black Money tangwa da suba u wa i daw toh wa wiar ka poisa wa da dep chon.
Discussion about this post