Ka lehkmen kutsnem ha chnong Jowai da pynkut ya ka ynne ka 2 tarik deiwa pyndep sa i baamdoh snem thymme kamjooh ka lai chaad neidaw wa ka 1 tarik da haap ko haka sngi Bibar hadien wa da pyndep chwa leh ya kiwa boon ki lehkmen haka 31 tarik hadooh i step synyaaw ka 1 tarik.
I lehkmen ynne kamwa da jooh leh toh iwa da pynbait da jar jiar ki dong wow chet u tu hadooh i pynbiang ya ki tanghæng yow lai chaad wa kiwi de ki lehkmen hadien wa da pynkut yei lai chaad.
Kiwa boon hi ki dong ha Jowai toh kiwa da sdang nadooh i miet ka 1 tarik yow pynkhreh yei chet i tu iwa da pteiñ hadooh i step yow pynman ya ka baamdoh yong chnong kawa dap wa bang heiwa da chet ya kiwa boon ki jait baam kiwa da pynkhreh kyrpang da ki chynrang wa kynthai ki dong ki chnong.
Hadien wa da pyndep ya ka baamdoh, da mih won da ki phaw hajar ngut wow lai chaad yong chnong deilang ki rwai e khublei snem warim wei wow pdiang snem thymme deiwa lai luti na kiwa boon ki bynta ka chnong Jowai wei kawi pa kawi ka dong da wan ki wow pynskit ha Iawmusiang hakhmat ka rynsan wa da booh da ka JTES yow pynyoo yei mynsien lehkmen wei wow pynyoo leh kiwon kiwa ye u pyntam ya kiwi hei chongchit.
