Jowai: Ki para wa ngait ka Balang Presbyterian yong ka KJP Synod Mihngi, ynnin ka sngi 1 tarik Wisu daki phaw hajar ngut da tooid ki cha ka yaseiñ khynroo ka KJP Synod Mihngi kawa khadphra (XVIII) wada man ha chnong Rymbai, Rymbai Presbytery East Jaiñtia Hills District wow ap u sñiaw yaki khubor naka ktieñ u Blai wada e da u Rev. P. Nongkynrih wa u Rev. F.M. Kympat.
Kani ka yaseiñ da sdang ko nadooh ka 28 tarik Thohlakhmi hadooh ka 1 tarik u Wisu wei hajrong ka phang wa ong “Im naka bynta u Khrist” (Galatia 2:20).
Haka yaseiñ step 10 waje u Rev. P. Nongkynrih da saam u yaka khubor hajrong ka phang “U ratbah hakhmat jong phi kumno phin jop ia u” deiwa pynchong yurim naka kitab wa nyngkong u Samuel lynnong wa 17 dkhot wa 25 ter ter. Lyngba kini ki dkhot da chem wa u David hei man khian yong oo wei wym toh hi u khynroo wa chkeh wa khlan i bor doh bor pran da nood u wow yakhun pyrchah ya u Goliath uwa man u ratbah ne u heh ki Philistia.
Kamtæ han hapyrdi i chah klam beiñ leh, u David ym em ran dien u, tangwa dei maya wei sñiawskem wa em u ha u Blai wa oo chakri u, deiwa yiat noh na kitæ wa thooh daw u pyndooh mynsien, deiwa kut yumut han wan i tynjooh ha oo, deiwa kynmoo yei jop wa u Blai da e u hei por wa dang man u kam u chare langbrot, deiwa looid yei riam yaleh wa da pynsap ya oo heiwa da toor u chakhmat wow yakhun te jop u yow Goliath uwa man u ratbah næ uwa yaleh wa khlan bor.
Lyngba kani ka khubor ong u waka ri ka jaitbru emkaam ko ki khynroo wa kam u David ki wow em ka mynsien wow ong nga wow yakhun neibynta ka jaitbru, ki para wangait, dei wow bood leh ka nongmuna u David khang yow jop yei eh wa em hakhmat yong i.
Heijooh i por wow kam leh yei jop hei pyrtuid u Blai.
Da duwai haroh u wa haka Synod 2020 u em sakhiat ki khynroo wow mynlliñ yei yong samen deiwa ong u, “mih neini deiwa kam kynti ha u Blai yow jop yei eh wa chah hakhmat yong phi, mih neini wa hakhmat yong phi waroh ki eh u em ki hapoh kjat neibhah wa phi em phi yow Blai wa im wa sakhiat, lada lai phi hei luti wada kah da kiwa boon ki eh, kani ka khubor u yarap ko yei im yong phi” ong u Rev. P. Nongkynrih.
Haka yaseiñ wa bood won, u Rev. F.M. Kympat da saam u ka khubor heiyatoh i chem u Elijah ya u Ahab, ka yurim naka kitab Syiem wa nyngkong lynnong 21 dkhot 20.
Lyngba kani ka dkhot da pynchong yurim u wa ha kini ki sngi i man Kristan chah tan hapyrdi i sih wa i bha, teiñ teiñ rap ye i bha, em won i por ye i sih, kamtæ da hap wow kup noh waroh ar.
Hawa yatoh wa ini ong u, em i yei man brublai tangwa len won i ka, man i ki Kristan wa da suspah dei snam u Jisu Krist tangwa ki kaam won ym yahaap ki, neibhah wa i pop kreh embor ko wei tlep ko yei bor pyrkhat kamtæ wym yoo de yei bor u Jisu.
Kamtæ khut u chei kylla wamut wei i lai luti u Ahab e haroh ko i sneiñ i kroo yaki paaid wa ngait.
Ha kani ka sngi da em leh i rwai Choir naka yaseiñ khynroo Balang Pomlakrai, Balang Jowai, Balang Rymbai ka Standing Choir JSKJPSM wa kiwi.
Discussion about this post