Ka Sarot I Man, ka seiñ ki 11 ngut chilok, haka 27 tarik uni u bnai da li e yarap ko cha ka chnong Muthlongrim da ki sula cha ki manyung wa emkaam yei yarap khamtam ha kini ki por tlang.
Da pdiang yei wan yong ki da u Waheh Chnong ka Muthlongrim, u Emhi Kanai heiwa da e kti u wow pynlai ya ka yalang da u Aziz War, u dkhot ka Sarot I Man, uwa da e yei kyrkhu kyrdoh ya waroh kiwa ya emlang.
Da yoh ya i ngoohblai na u Ram Sumer katwa ya i klam wow batai chaphang ka Sarot I Man da yoh na u Riquoma Rq. Laloo. Da yoh leh ya i kyntien klam na ka Secretary Chnong Muthlongrim, ka Joyful Kanai katwa ya ki kyntien e khublei da e da u Shape Pasweth.
Hei klam yong u Riquoma, da batai bniah u chaphang ka Sarot I Man wa i lai luti yong ka nadooh wa sdang u seiñ ya ka. Da ong u, pait ya lailæng phi wa ha kini ki por wa dajan ka Election ya ong pathan phi wa wan pynbiej Election hi eh i phi. Ka Sarot I Man ha ka hi ym em u tba ko, wei wym chah hi ko leh wow yapsiah khlieh ki kaam Election ha ka. Em ko i mynsien wow yarap ya kiwa emkaam sakhiat i yarap kat i khon wa yoh ko na kipor cha kipor. Kyntu haroh u ya ki manbei wa, ymhoi u pyndooh kyrmen ya ki khon yong ki ha ka liang ka puræ puthi, la kat chawa man leh ha kini ki sngi, emkaam bha u man ki khon kiwa stat wa tip. Khut haroh u ya waroh deiwa kyrpaad wow pyntip paidbah, wa ka Sarot I Man daw pynman ko yaka Awareness cum Blood Donation Camp ha Jowai Blood Bank ha ka 12-12-2022 nadooh i por 10:00 waje i step, kiwon kiwon kiwa sñiaw ye u e snaam ha katæ ka sngi, ye ki u wan wei u pdiang ya ki dei mynsien sñiawbha.
Ka Secretary Chnong da pynsñiaw ko ya ki kyntien wa kmen wa em kam kani ka seiñ wa chynna yei emkaam kiwa chong chnong khamtam cha ki thaaiñ yong ki cha palatsor. Da kyntu ko ya waroh kiwa wan ha katai ka sngi wow pdiang yei e ka Sarot I Man deitæ i mynsien wa khooid wa kyllooid. E ko i kyrkhu kyrdoh ya ki 11 ngut yoh ki u man kiwa nang ye chooh chooh u pynheh ya ki kaam yong ki ha ka luti wa im ki chiruplang ka chnong ka thaw yong ki waroh kawi.
U Waheh Chnong ka chnong Muthlongrim, da ong u wa kam u bru wa yahkhmat yaka chnong, ym em u itæ i mynsien wow sarong wow dam u pdiang yeiwon iwon i wan e yarap ki seiñ næ ki bru samen cha ka chnong yong oo. Weiwa ong u leh, wymtoh hi u dawa na kiwa e, pdiang katkam i e ki, la ha kawon kawon ka dur leh.
Hadien wa dakut ka yalang wa tbian, da saam ya ki sula cha kiwa wan ha katai ka yalang, katwa ya ki watam da e kti ha ka Secretary chnong wow saam pyndep.
