Kiwa tem sur Reggae wa pawnaam ka America wa tip kam ki Big Mountain ynne dapoi ki ha ri India yow lai tem ha Loomkyntoor Resort wa em ha Shkenpyrsit, West Jaiñtia Hills District haka 10 tarik uni u bnai (Dec) deiwa emlang leh u Earl Gateshead u Reggae DJ wa pawnaam ka pyrthai.
Kam ka dhab tem, ki Big Mountain da sdang yaka ha u snem 1986 wei da pawnaam ki ha u snem 1994 da i rwai “Baby, I Love Your Way” iwa man i sur wa da pynka-it ya ki bru ha kylleiñ ka ri wei da emlang ki waroh 10 ngut kiwa tem wa yahkhamt katni da u Joaquin “Quino” McWhinney kam uwa rwai wei tem Guitar, u Michael Hyde wa tem Keyboard, u Paul “Groove-Galore” Kastick uwa tem Drums, u Richard “Goofy” Campbell uwa tem Keyboard, u Reggie Griffin uwa tem Guitar wa Saxophone, u Danny Lopilato uwa tem Guitar wei uwa rwai leh heijooh i por, u Andre Sias uwa tem Drums, u Luis Castillo uwa tem Percussion kamjooh uwa rwai, u Jakob McWhinney uwa tem Guitar wa u Michael Ortiz uwa tem Bass.
Ynne i janmiet, kini ki dkhot ka Big Mountain dapoi ki ha India wei dapoi sah chwa ki ha Shillong chwa u poi ki cha Jowai mynstep.
Ha ka 10 tarik chwa u tem ki Big Mountain, daw pynchit chwa da kiwa tem Reggae wa pawnaam ka Ri-loom Jaiñtia, ki Dew Drops wei daw tem leh ki Rum & Monkeys, ki Nexus Band, ki Imprints wa ki Seis Euphony wei ki paidbah ye ki u sdang poi nadooh 1:00 waje i sngi ha Loomkyntoor Resort.
Neiliang uwa rwai ki Big Mountain u “Quino” da pynsñiaw u yei kmen wa da yoh u u hiar kjat ha India wei wow wan cha Meghalaya haka sien nyngkong deiwa yooluti leh wow yoo ya chiboon ki paidbah wa maya sur ka jylla.
Neiliang kiwa pynman ya kani ka tamasa da khut sñiawbha ki ya phi ki paidbah wow wan pynchongchit wei wow sakhi leh ya kini kiwa tem sur Reggae wa pawnaam ka pyrthai ki “Big Mountain”.
