Jowai: Ka Chankylliang Development Society (CKDS) wa yahkhmat da u Chanky Lyngdoh uwa man kam u Managing Director kamjooh leh uwa man kam u MDC ka thaaiñ haka Sngi Choh-that ka 14 tarik da e yarap ko ya ki chnong waphær waphær wa haap hapoh ka 13-Saphai Constituency wa kynthup ya ki tiar kam ki ben, ki miej, ki chuki, ki tanghæng namo ki PA System wa ki kor computer ha ka yalang wa pynman ha chnong Umsalait, West Jaiñtia Hills District.
Ya ki ben ki miej wa ki kor computer da saam cha ki skur katwa ya ki tanghæng won da saam cha ki bor chnong wow yoh ki u pynemkaam hapoh chnong.
Heiyatoh wa i saam ya ki tanghæng napyrdi ki 20 tylli ki chnong wa haap hapoh ka 13-Saphai Constituency da saam du cha ki 16 tylli neibhah ki 4 chnong da em chwa ki ya kini ki tiar wei da saam leh ryngkat ki Amplifier, ki Horn, ki Microphone wa ki wire.
Katwa ya ki tiar kam ki ben ki miej ki chuki wa ki kor computer won kamwa 27 tylli ki skur da yoh yarap ki wei ki kor computer nawon da saam du cha ki skur Secondary Level.
U Chanky da ong u wa ya kini ki e yarap da yoh lyngba ka NEEPCO hadien wa ka Society da lai yaklam ko wa ka neibynta wow yoh myntoi ki paidbah.
Chwa ini da em leh ka yalang pynsñiawthooh paidbah da kani ka Society hajrong ki myntoi kiwa yoh na ka tnat Labour Department kawa haap hapoh ka Meghalaya Building and Others Construction Workers (MBOCW) Regulation of Employment and Conditions of Service) Rules 2008.
Ki myntoi wa ye u yoh kynthup ki ya ka bai baam tymmen, ka Scholarship ki khon ki kti ha i puræ puthi, ka disability pension, ki laad yarap heipor wa yoh khon (arngut), wa kiwi kiwi wei ya kini ye u yoh hadien wa da pynpsiah pyrtuid ha ka tnat Labour Department.
Ha kani ka sngi da emlang ki waheh chnong, kiwa sikai, ki khynnah skur wa kiwi kiwi.
Discussion about this post