Ka Bosco Pnar Multipurpose Vocational Training Centre, Salini Colony, Mihmyntdu Jowai, ha ka 22 tarik uni u bnai da e ko ya ki Certificate wa ki Start Up Tools cha 48 ngut ki khynnah chynrang kiwa da dep chah hikai ha ka kaam Domestic Electrical Solution waka Plumbing General kawa haap hapoh ka MSSDS Project yong ka Batch wa nyngkong.
Da emlang ryngkat u MLA yong ka Jowai Constituency u Wailadmiki Shylla kam u kongsan ha kani ka sngi wei da emlang u Lambomi Suchen uwa man u Skill Development Officer (SDO) yong ka Meghalaya State Skill Development Society, West Jaiñtia Hills District.
Da pynlai ya ka yalang da u Bro. Lambert Lyngdoh heiwa da yoh ya i klam na u Lambormi Suchen, uwa da kyntu haroh ya ki khynnah wa da chah hikai wow man ki kiwa tista ha ki kaam yong ki wei ymtoh wow pynsepai ya ki iwa da chah hikai ki.
Neiliang u Wailadmiki Shylla da ban joor u ya ki khynnah wa da chah hikai wa lyngba ki Start Up Tools wa da yoh ki wow pynemkaam hok ki ya ki wei ymtoh wow booh donhi ya ki ha kdong. Da ong u wa ki khynnah ymtoh u yang ki hadooh wa da em kiwa e kreh ya ki namo hadooh wa da yoh da ki kreh wa heh tangwa toh wow sdang nyngkong na i kreh wa khian namo kat iwa yoh.
Kam wow khana heini, ya ka Skill Training da wanrah da ka Bosco Pnar MVTC Salini Colony-Mihmyntdu-Jowai kawa jooh man ka thaw wa e sikai ya chiboon ki khynnah hapoh ka thaaiñ Jaiñtia wei na kiwi kiwi lyngba ki Skill Training waphær waphær neipor cheipor. Wei katni da embhah wow yoh laad wow e sikai ya chiboon ki khynnah chynrang ka thaaiñ Jaiñtia lyngba ka Skill Meghalaya Project yong ka State Skill Development Society.
