Ka Seiñ Raij Raliang da pdiang sñiawbha ko ya ki le ngut ki chipayu kitæ u Lambok Singh Lyngdoh, ka Queenvida Lyngdoh waka Daplinda Lyngdoh kiwa na Ladthadlaboh, Jowai ha ka 28 tarik ha Yung Seiñ Raij Chrah-Umphula heiwa da wan e ki ya ki tiar yongrim cha ka Seiñ Raij Raliang wow booh sah kynmoo ha ka yung “Booh Tiar Yongrim” (Museum).
Ka Seiñ Raij hawa pdiang ko ya ki tiar da pynsñiaw ko yei sñiawngooh wa khroo tam ya kini ki le ngut chipayu wa da wan e ki ya kini ki tiar ki wym jooh yoo, wei ki wym em de ha ka juk wa katni kam u Cher Behkpong, ka wait yaleh thma, wa u Kitli Cha Naar wa chna ha ka ri England.
Ha kani ka sngi ka Idalana Lyngdoh kawa na Raliang, ka leh da e sñiawbha ko uwi u Kchu wa stem khian yow booh sah kynmoo ha ka Seiñ Raij.
Ha chwa u e kti ya ki tiar da pynman ya ka yalang wa tbian heiwa da pynlai ya ka da u President ka Seiñ Raij Raliang, u Binroy Dkhar, katwa ya i kyntien ngooh Blai da e da u Rideiwa Dkhar wa ya i kyntien pdiang burom da e da u General Secretary, u Hamjhan H Dkhar uwa da khana da batai leh wa i em kani ka Museum pynmyntoi ko ya ka mynried yong ka pateiñ wa daw wan wa boon katni wym jooh yoo de cha pyrthai lait na hei dur wa ha TV donhi kamtæ deiwa em kani ka Museum yoh ki u pait u yoo ki cha pyrthai.
Kamjooh leh da yoh i klam pynche na u Lambok Singh Lyngdoh, uwa e ya ki tiar heiwa da ong u wa kwah u libooh ya kini ki tiar ha kam kini ki yung wa em wa pait wa sumaar ya ki lait ki u wiarnar, da yoh leh i klam na u Dr. M Tyngkan wa na u C. Lyngdoh, Dolloi Elaka Raliang.
