Ka yung krehkaam u Deputy Commissioner, West Jaiñtia Hills chirup i yakrehlang ka yung krehkaam u District Sports Officer, West Jaiñtia Hills ha ka 29 wa ka 30 tarik u Naisaphra kam ka dak i ya ksohktilang hei kynmoo burom ya ka National Sports Day da pynman ki yalehke wa kyrpang ha Kiang Nangbah Stadium, Jowai.
Ka thong yong ka sorkar India wow pynman ya kani ka sngi kam ka National Sports Day toh ha ka yurim wow e naam e burom ya u Major Dhyan Chand uwi na kiwa yaleh Hockey wa bna naam ka ri India.
Ha ka sngi nyngkong yong kani ka National Sports Day chwa wow yoh laad ki khynnah skur u ya pynyoo pyntaw sap da kdar yahkhmat u Khroobok Passah, District Sports Officer, West Jaiñtia Hills da i puræ ya ka Fit India Pledge hei chimbyntlang da waroh kiwa ya chimbynta.
Ya kani ka National Sports Day da wan wow sakhilang da u Marsooki Kyndait wa man uwi na ki Athlete næ uwa yaphet wa bna naam ka Ri-loom Jaiñtia uwa da rah naam rah burom ya ka District, ka jylla ha kiwa boon ki yakob phet wei ki yakob wa da pynman kyrpang neibynta ki khynnah skur ha kani ka sngi toh ki Traditional Sports wa kynthup ya ka Yatan Tylle wa ka Dat Mooniaw kamjooh leh da pynman ya ka yalehbol.
Ha ka sngi wa ar yong i leh burom ya ka National Sports Day da pynman ya ka Badminton Competition ha Kiang Nangbah Indoor Sports Complex heiwa u Mebanker Shullai uwi na kiwa yaleh Badminton wa bna naam ka District wa ka jylla da wan u wow emlang kam u kongsan, neitæ da pynman leh ya ka Children Sports for Grass Root ha Kiang Nangbah Stadium kamjooh leh ya ka Cycle Rally kawa da sdang na Kiang Nangbah Stadium chadooh Tlumuwi.
Ha ka yalang pynkut yong ka Children Sports For Grass Root kawa da man hei pait i pynlai ki Football Coach yong ka WJDSA wa kynthup ya u Milan Lynrah, u Dawanohi Shullai, u Pink Suting wa u Amity Tongper heiwa da wan wow emlang leh da u Khroobok Passah, DSO, West Jaiñtia Hills heiwa da e u leh ki kyntien pynchlur wei e mynsien ya ki khynnah hajrong ka thong yong ka National Sports Day.
Discussion about this post