I wan ka khlam COVID-19 hapoh ka jylla waka ri hi waroh kawi da wanrah ko yei thut ha kiwa boon ki liang nadooh i khih i kreh, i puræ puthi wa kiwi kiwi, nadooh ha sor hadooh palatsor neibhah wa neiliang ka sorkar da khang lut ko yaki yaw ki haat, ki thaw puræ puthi, ki yungmane wa kiwi won ki jait yalang paidbah hajrong ka thong yow pynduna nei poor kani ka khlam.
Heiyatoh wa ki yungmane ha ki chnong waphær waphær kamjooh ha sor, da yoo da sakhi yei lyngam neidaw wa ki paidbah wym yoh laad de ki u lai li mih yow chakri Blai yonglang kamwa jooh leh.
Kamtæ ha lyndet ini i chah tynjooh i chah khanglaad wow lai li mih cha ki thaw mane Blai, man won ka khubor wa sñiawsuk u chem wa haka Balang Presbyterian Pynthor Langteiñ, West Jaiñtia Hills District, wa hanla wym yohlaad de ki u lai cha yungmane leh, i chakri Blai deiwa pynmanlang ha i jooh i por man hi ko kawa lai bait man-ka-sngi Bibar tangwa ha jar jiar ki yung ki sem.
Chwa u sdang yaseiñ, kam i dak u pynkynmoo ya ki khon ka Balang wow man kiwa khreh ha ki yung ki sem, da choh leh daka waje kamwa jooh leh chwa u man yaseiñ kam heipor wym pu em ka khlam.
Hei yaklam wa u Tbn. Harlington Dkhar, khana u wa yeini ka Balang da pynbait ko hajrong ka thong yow lai bait i chakri Blai wei ki khon ka Balang leh u lait ki wow mylliñ yow Blai deiwa nang pynkhlan yei ngait hapyrdi i pynthut ka khlam.
“Yeini i rukom pynman yaseiñ da sdang nadooh u snem 2020 hadien wa ka sorkar da khang ko wow lai cha ki yungmane. Ha u snem 2020 katwa i man i long ka khlam leh ym pu em ware poor ko cha kani ka thaiñ yong i, kamtæ kam i sdang næ i yah luti neiliang ki bru waheh ka Balang da lai ki chaki manyung yow pynyoo kammon u pynlai ya ki yaseiñ haki yung,” ong u Tbn. H.Dkhar.
Da jia biang ha uni u snem hadien wa ka sorkar da khang biang ko wow wai yungmane wei ka khlam leh da poor ko kylleiñ, kamtæ ki waheh yong ka Balang da chaniah bait ki hapoh i pynlai yong jar jiar ki yung kamwa da yoh sikai ki ynnin u snem, heijooh i por leh ym em de chah wow ya lai yaseiñ na kawi ka yung cha kawi.
“Ini i pynbait wow man yaseiñ ha jar jiar ki yung leh e myntoi hi ko ya ki khon ka Balang kamjooh ki manyung lyngba i ya chimbynta lang yong ki waroh, hanla ym ya emlang hapoh yungmane tangwa waroh ki dkhot da emlang ki ka yung ym em wa dam deiwa hap u lai cha yungmane,” khana chooh chooh u Tbn. H. Dkhar.
Ki kaam wa da pynbait ka Balang heipor wa pynman yaseiñ yung toh u lum e ngooh wei u pynpoi cha ka Balang, neitæ u em i ya duwai kyrpang neibynta ka Balang, neibynta ki yung Kristan, ki chong ki thaw waka ri hi waroh kawi, najrong i klam katkam i ktien u Blai.
Hei yoh u yaklam won wa ki khon ka Balang wa kynthup ya u Pailami Lypon waka Da-i-hun Lypon, pynsñiaw ki wa i wan kani ka khlam man sakhiat i dooh nong wa khroo neidaw wym yoh de ki u lai cha yungmane, tangwa ini i pynbait ka Balang yarap ko ya ki yung Kristan wow jan cha u Blai wei kamjooh ki dkhot ka yung ki wym jooh em poi cha yungmane.
Neitæ ong ki ini man leh ka laad u yachemlang chi yung chisem, u ya chem yumut wei yohlaad wow ya kyntu kyrsu, da wanrah leh yei yatylli haki manyung, najrong wow tei yei man i long wa kynja mynsien.
Kamtæ kyntu ki ya kiwi won ki Balang Kristan wym toh u e laad wa ini i man i long ka pyrthai ha kam kini ki por u khanglaad ne pyndooh ko yaka spah wa kynja mynsien.
