I oor khyndaw ha tymbud u National Highway-62 wa pynyabi ya ka chnong Siju, Karukol wa Baghmara, South Garo Hills cha East Garo Hills wa Assam toh kawa da chah khang la 6 sngi. I kreh yow pynchna toh iwa da sdang tangwa nei rukom chah ktah u sarok daw chimpor hadooh wow ye u wai biang ya uni u sarok.
Heiyatoh wa ini, neiliang u Montri Rangbah ka jylla, u Conrad K. Sangma da lai pait u ya uni u sarok ynnin ka 22 tarik wei da hap chong u da ka lieñ kamwa ar kynta wei da lai kjat won sa le kynta yow poi cha Rongdong.
Da khyrngiat u wow yoo yei chah ktah wa i sih u sarok hadooh wa da kylla u kam ka wah ha 12 tylli ki thaw ha i bynta wa jrong 7-8 Km. Ki wah dooid leh da kylla ki cha ki wah wa heh wei da em leh ki moo wa heh kiwa da pynsih ya ki sarok.
U Conrad da ong u wa hanla i kreh toh iwa da sdang tangwa hawa yoo yei chah ktah ki sarok da booh ko hei eh ya kiwa chna.
I Siju iwa man kam i thaw uiñke suwari wa pawnaam wa em ka krem Siju toh iwa da chah ktah tangwa ka krem toh ka wym em chah ktah tangwa waroh iwa da pynkhreh neibynta kiwa uiñkesuwari toh kiwa da chah tympra lut nadooh ki yung. Da em leh kawi ka kynthai wa dooh yei mynsien hajan ka krem Siju nei oor khyndaw heiwa u kurim ko da yohlaad u wow yut.
Neiliang u Conrad da e kti u ya ka poisa yarap kawa T. 4 lak cha kiwa hayung kani kawa da khlaad wei hadien ini da lai pait u leh ya ki soo ngut kiwa da mynsoo joor kiwa dang chah sumaar ha Siju PHC.
Ki tymmen ka Siju hawa yaklam wa u Conrad da khana ki wym jooh em yoo slap ki uwa joor hadooh katni wa i oor khyndaw la 50 snem. Em kiwa da khana wa ha u 1964 da em iwa sariem kam ini wa jia ha Siju tangwa ym em hadooh katni joor i chah ktah kam ha uni u snem.
Da ong ki leh wa ka wah Simsang hajan ka krem Siju da ku ko palat 30 phut na iwa jooh ko heipor wa slap.
Ka yingkieñ doi doi kawa tip kam ka Rewak Hanging Bridge kawa man leh kawa jrong dooh ka yingkieñ doi doi hapoh ka jylla kawa pynyabi ya kiwa boon ki chnong wa em ha ka wah Simsang da chah tympra. Kani ka yingyieñ toh kawa em 50 phut hajrong ka wa wah Simsang tangwa da chah tlep ko ha ka um wei hadien wa hiar ka um da chem wa kani ka yingkieñ toh kawa da sih.
“I chah ktah man i wym toh de iwa ke wei ka sorkar u leh ko katwa ye ko yow yarap,” da ong u Conrad deiwa pynrap wa ini i lai pait yong oo toh yow sñiawthooh hadooh katwon wa da chah ktah. Da ong u leh wa i pynpoi bordiñ cha kini ki thaw toh iwa hakhmat dooh wei i kreh da lai i chakhmat.
Ynnin 2100 kg ki marbaam wa kiwi de kiwa emkaam da pynpoi ha Maheskhola da ka India Air Force.
