Ynne ka 30 tarik kamwa man khlieh u snem, ka Kiang Nangbah Iasiat Khnam Memorial Society (KNIKMS) da kynmoo tympang ko ya u Woh Kiang Nangbah ha ka lyngkhooh snem wa 159 wa chah pasi u ha ki Pharæng. Heiwa yeini i kynmoo warom da pynman ha Madan Madiah Kmaiblai hajan u Mot Sahnaam u Kiang Nangbah harood Syntu Ksiar ka Wah Myntdu hei yakrehlang wa ki bor District ka West Jaiñtia Hills kam chibynta yong i lehkmen dap 75 snem ka ri wa 50 snem ka jylla.
Ya ka yalang ynne da pynlai da u Deputy Commissioner ka District, u Garod LSN Dykes wei u Montri ka chnat bhalang ka jylla, u Kyrmen Shylla da man u kam u kongsan hei emlang u MDC ka Jowai South, u Saron Paswet kam u symbood kongsan.
Ynne ka sngi chwa wow booh syntu ha u mot u Kiang Nangbah wei wow pynhær ya ka lama ka seiñ da yoh ya ki kyntien ngoohblai na u D. Sumer.
Neiliang u Kyrmen Shylla hawa e yei klam da yaroh u ya ka seiñ KNIKMS wa da ye ko wow pynman ya i kynmoowarom ya kani ka sngi wei ka pateiñ da rap yoh ko leh u tip kajiak chaphang uni u khlawait ka ri.
Da ong u wa katkam i thooh bniah wa i tip yong oo, ka yaleh ki jaitbru Pnar pyrchah ya ki pharæng da man ko kawa joor hadooh kattæ wa da pynbor ya ki wow phah da ki spah ngut ki chipai wei ya ini i yaleh hapoh i yahkhmat u Woh Kiang Nangbah da tip leh kam ka thma khian namo ka ‘Little War’.
Ha kani ka sngi da booh leh ya u syntu ha u mot sahnaam u Woh Kiang Nangbah na u kongsan, kiwa chah khut sñiawbha wa ki seiñbhalang na Ri-loom Jaiñtia.
Da saam leh ya ki khusnaam cha kiwa jop ha ki yakob siat khnam wa da pynman da ka seiñ.
Ynne ka sngi da lehwarom leh ya ka da ka Seiñraij Jowai ha Myngkoi Pyrdi, Loompyrdi Iongpiah heiwa u Kyrmen Shylla da man u kam u kongsan, u FR Kharkongor u CEO ka jylla da man u kam u symbood kongsan.
Ha kani ka sngi da emlang leh uwa sikai ka skurbah NEHU, u SN Lamare kam u bru chemphang uwa da khana ya ka parom u Kiang Nangbah wa i yaleh yong oo pyrchah ya ki pharæng katkam wa chem u na i thooh bniah wa da leh u ha ki snem wa dadep deiwa kyntu ya ki khynroo wow pteiñ ki yei thooh bniah hajrong i yaleh pyrchah ya ki Pharæng.
Ha ka yalang da saam leh ya ki khusnaam cha kiwa jop ha ki yakob waphær waphær wa da pynman ha ki sngi wa dadep da ki chnat ka seiñ wei da pynphooh ya ka sngi da i lehke Drama na ka Loompyrdi Iongpiah wa ki chaad na ki khynnah khynroo khyllood hajrong ki sur wa chna chaphang u Woh Kiang Nangbah.
