Neidaw wa ka lyngkhooh sngi yap kawa 187 yong u Tirot Sing Syiem, hap ko ha ka Sngi Bibar ha uni u snem, da kynmoo warom noh ya kani ka sngi ynne ha Madan Nongrah, Nongkhlaw, Eastern West Khasi Hills District.
Ha kani ka sngi da pynman ya ka yalang da ka Tirot Sing Syiemlieh Death Anniversary Committee, Hima Nongkhlaw chirup wa ka Centre for Historical Research, Synod College, Shillong wa ka chnat Arts and Culture ka sorkar jylla.
Ya kani ka sngi kynmoo warom da wan sakhi da u MP ka Rajya Sabha ka jylla Meghalaya, U Dr. W. R. Kharlukhi hei emlang kiwa sikai ka History Department ka skurbah NEHU kam ka Prof. Amena N. Passah, u Additional Deputy Commissioner ka Eastern West Khasi Hills District, u V. Swer, u Deputy Superintendent of Police (Headquarters) ka District, u H. Kharkongor, wa kiwi kiwi.
U Dr. W.R Kharlukhi, hawa e yei klam da ong u wa kam chibynta wow lehkmen ya ka Azadi ka Amrit Mahotsav kawa yatoh wa i dap 75 snem wa laitlooid ka Ri India, ka Sorkar Pyrdi da booh ko ya ka thup yong ki 115 ngut ki bru kiwa da yaleh laitlooid heiwa da kynthup leh ya i pyrtuid u Tirot Sing Syiem wa kiwi kiwi.
Da ong u wa hanla u Tirot Sing da khlaad noh u 187 snem nachwa tangwa da im bait i pyrtuid yong oo, wei da kynmoo ya oo hadooh kini ki sngi ym du ha chnong Nongkhlaw tangwa ha waroh kawi ka jylla Meghalaya.
Neiliang ka Prof. Amena. N Passah, da klam ko hajrong i lai luti u Tirot Sing kam u bru wa yaleh laitlooid ka ri hadooh ka sngi wa khlaad noh u ha ka 17 tarik u Naiynñiaw 1835.
Da pynphooh ya kani ka sngi da ki rwai wa ki chaad tynre na ki khynnah kani ka thaaiñ.
Ha kani ka sngi da booh syntu leh ha u motdur u Tirot Sing Syiem uwa em ha Khasi Patriotic Home, Nongkhlaw.
