Jowai : Ka office yong ka District Social Welfare Officer West Jaiñtia Hills District ha kani ka 8 Naikhynde da pynem warom ko ya ka sngi ki kynthai kam chi bynta ka International Women’s Day ha Yungwalieh ka Dulong, Jowai.
Ha kani ka sngi pynem warom ya ka sngi ki kynthai, da wan emlang ki manbei, ki khyllood na ki 13 tylli ki seiñ kynthai wa em hapoh West Jaiñtia Hills District deilang ki sahep sorkar wa kiwi kiwi.
Ka kong ZJ Lyngdoh, District Social Welfare Officer hei klam yong ka ong ko hei sakhiat ya ka sngi pynem warom ya ki kynthai, haap ko haka 8 Wisu (March), katwa jia syndet won i yap u MP ka Tura parliamentary Constituency u Purno Sangma da pynpep ya ka wei da rah noh ha kani ka 8 Naikhynde.
Hei yatoh wa kani ka sngi won da khana ko wa i daw wa ya ka sngi yong ki kynthai da pynem warom ha kylleiñ ka pyrthai toh yow kyrchaan ya i yakhun i yakhih yong ki kynthai nadooh ki spah snem wa da lai, neidaw wa chah yoobeiñ chah ban beiñ ki ha kiwa boon ki liang ha ka imlang sahlang.
Kamtæ hadien wa da jop næ yoh ki yei hok da tipmit ya ka sngi kyrpang yong ki ha kylleiñ ka pyrthai wei da pynem warom khlieh ki snem kam chi bynta u kyrchaan yei jop yong ki, kamjooh u yoh i tipmit liang wanang nadooh ka sorkar, ka imlang sahlang wa kiwi kiwi.
Ka kong Lyngdoh da ong ko, han hadien wa ki kynthai da yoh ki yei hok leh dang boon hi i chah yoobeiñ ki ha kiwa boon ki liang wei boon i eh i khoo wa chem ki nadooh na yung ha lait, iwa em ha imlang sahlang, neitæ i daw ha kani ka sngi da e yei klam cha ki manbei ki khyllood hei yatoh wa ki skim sorkar waphær waphær wa ye ki u kreh u khih yow ye ki u kyrchaan ya ka yung ka sem, neibhah ha kini ki sngi boon ki manbei neidaw wym ye ki u pyndap pynbiang ya ka yung ka sem ki khon ki kti mih boon i eh haka imlang sahlang.
Ha kani ka sngi neiliang ka kong L Laloo, District Agriculture Officer, Jowai, da pynche ko ya ki kynthai yow chim ki yei kaam rep kaam riang, i kaam ri sniang ri syiar i wym toh iwa saja yow ye ki u pyndap pynbiang ya ka yung ka sem.
U ma P. Suja na ka Office ka District Commerce & Industry Centre Jowai batai u chaphang ka kaam ri ngap, kaam soor kamjooh ka Central Scheme wa ye ki u chim neibynta u seiñ khih, kawa da tip ka PMEGP Loan wa hapoh T. 1 lak.
Ka Dr. S.M. Kharbudon da klam ko hajrong ki skim wa ye u yoh na ka tnat Veterinary & Animal Husbanary.
Heijooh i por ka District Social Welfare da pynbna ko wada e form neibynta ki manbei wa khih samen yow yoh ki i yarap, wa i e yarap poisa (financial assistant) nei bynta ki khonswet kynthai kiwa kwah u bia.
Da yoh leh yei klam na u ma Dawan Dkhar, Waheh Chong ka Dulong, Dr J.N. Phawa wa kiwi kiwi.
Discussion about this post