Jowai : Kamwa leh waroh chi tyllup ka pyrthai, ynne ka sngi ka Meghalaya Veterinary Services Association Jaiñtia Hills District Unit da leh warom ko ya ka World Rabies Day ha ka ophis yong ka A.H. & Vety. Officer, Mynthong, Jowai yow pynche paidbah wa kammon u yada na i kjut Rabies heiwa boon toh kiwa poor cha ki bru na ki ksaw.
Ka phang ha uni u snem toh Educate Vaccinate & Eliminate neibhah ini i kjut Rabies toh i wym em dawai wow pynbha lada yoh ya ini i kjut wei man ka 15 minit da em bait wa yap na ini i kjut ha pyrthai kamjooh leh 4 na ki 10 wa yap toh ki khynnah katkam wa ong ka World Health Organization (WHO).
Ka thong ka WHO toh wa ym hoi u em de kiwa yap na i kjut Rabies ha u snem 2030.
U Dr. I Tongper, DM&HO West Jaiñtia Hills da pyntip wa ya ki bru wa chah dait ksaw wa em Rabies toh u pynyoo wut wut cha ki doctor wei ya i bai injection toh T. 250 chisien inject wei ya kiwa wan na ki yung wa dooh (BPL) won toh T. 20.
U kongsan ha kani ka sngi u ma S.C. Laloo, MCS wa man leh kamjooh kam u CEO ka Jowai Municipal Board da pyntip wa em kamwa 300 tylli ki ksaw ha Jowai wa da em pyrtuid (Registered) wa ka Municipal.
Ya i klam wow pynche chaphang i kjut Rabies cha kiwa emlang ha kani ka yalang kynthup ko ya ki soo tylli ki skur ka North Liberty HS School, ka Government Boys’ HS School, Ka H.K. Singh Memorial School wa ka St. Mary Mazzarello School da e da ka Dr. E. Passah, A.H. & Vety. Officer, Jowai.
Hadien i klam ka Dr. Passah da e ya ki jingkylli cha ki khynnah skur yow yoo katwon sniawthooh ki ya i kjut Rabies wei ya kiwa stad u jubab da e khusnaam cha ki.
Ha kani ka sngi leh da em i e injek Rabies Vaccination wa mynkna ya ki ksaw. Ya ini i inject leh ye u yoh dei mynkna heiwon heiwon i por na waroh ki ophis kamjooh ki dispensary ka tnat Veterinary.
Also Read: Iwa emkaam u tip chaphang i kjut Rabies
Discussion about this post