Shillong: Wow kynmoo warom ya ka sngikha yong uwa sdang ya ka Red Cross Movement, u Henry Dunant, da lehsñiawbha ya ka World Red Cross ynne ka sngi da ka Indian Red Cross Society ha Raj Bhavan, Shillong heiwa u lat ka jylla, u Ganga Prasad, uwa man leh u President ka Meghalaya Branch of the Indian Red Cross Society, da man u kam u kongsan.
Kam u kongsan, u Ganga Prasad da pynkynmoo ya kiwa emlang ha kani ka sngi wow kune ki ya ki thong yong ka Red Cross Society wei uni u snem ka thong toh “Everywhere for Everyone – Smile”, heiwa da ong u wa ka Meghalaya Branch of the Indian Red Cross Society dang em ko hapyrdi ka luti wa jngai.
U montri ka tnat Health ka sorkar jylla, u AL Hek kam u Vice President ka Meghalaya Branch of the Indian Red Cross Society da pynksan u wa emkaam wow man ki kiwa kreh na mynsien, wei wow pynkhlan ya ka deiwa em ki volunteer nadooh ki skur wa ki khynnah puræ ki College wa ki University.
Da ong u wa ka Meghalaya em ko ha ka Zone 5 ha ka Seismic Map, namo ka thaw kawa ye u khih khmi wa joor, katwa kamtæ emkaam u yoh ya ki volunteer ki wow kreh wow e yarap cha kiwa emkaam.
Kiwi kiwa da klam kynthup ki ya u Chairman ka Meghalaya Branch of the Indian Red Cross Society, u W R Marbanaiang, (Retd. IPS).
Ha kani ka sngi u Lat da pyllait u ya ka World Red Cross Flag wei da e u ya ka Life Time Membership Certificate cha ki 32 ngut na ki 76 ngut ki dkhot. Da pynphooh ya kani ka sngi da ki rwai ki chaad wa kiwi kiwi.
Discussion about this post