Ka Art of Living Jaintia Hills Unit chirup ka Dorbar Chnong Chilliangraij kam ka dak i ya ksohktilang wa ka pyrthai hei kynmoo warom ya ka 8th International Yoga Day kawa man ynne ka 21 tarik Naiynru da pynman ko ya ka yalang wa kyrpang ha Yungwalieh ka Chilliangraij.
U P. Toi, President Art of Living Jaintia Hills Unit wa man leh kam uwa sikai namo u Instructor yong ka leh Yoga ha kani ka step da e mynsien u ya kiwa ya chimbynta deiwa khana chaphang ka yurim yong ka Yoga wa ki rukom yoh myntoi hawa leh ya ka wei da kyrsu kyntu u leh ya waroh wow pynmyllien u leh ya ki rukom yong ka man-ka-sngi neibynta wow man ki bru wa chait wa khiah hei doh i pran, i bor thij bor pyrkhat wa ha ka spah mynsien.
Chooh chhoh ha ka chnong Jowai kiwi kiwa da leh burom ya kani ka sngi toh ka Panaliar Women’s Welfare Committee, Jowai ya kawa da pynman hei por step ha Yungwalieh wei da ya chimbyntalang leh da u Riquoma Rq. Laloo, Waheh Chnong Panaliar deilang u Phrangsngi Challam, Symbood Waheh Chnong Panaliar.
Ha Shangpung, Laskein Block leh ya kani ka sngi da kynmoo burom deiwa pynman ka ylang kyrpang ha Auditorium Hall Shangpung Pohshnong hei chimbynta chongchit ki manbei manpa wa ki khon khynroo khyllood.
