Ka International AIDS Candlelight Memorial 2022 da kynmoo warom ya ka ynne ha Khliehriat West Community Hall, East Jaiñtia Hills District hajrong ka phang “We Remember-We take action-We live beyond HIV ” ya kawa pynman da ka Meghalaya State Network of Positive People (MSNP+), chirup wa ka Rashtriya Kishore Swasthya Karyakram (RKSK) heiwa u DC ka District, u A. Baranwal da man u kam u kongsan katwa ka Dr. (Mrs) N.P. Suchiang, District Immunization Officer won da man ko kam ka symbood kongsan.
U A. Baranwal da ong u wa ki Information Education Communication (IEC) namo ki kot ki sla nadooh ki Poster wa ki Hoarding kiwa yatoh waka HIV/AIDS daw booh ya ki ha kylleiñ ka District deiwa kyntu ya ki chnat wow krehlang wow pynche pynsñiawthooh paidbah hajrong kani ka kjut.
Da ban joor u wa ymtoh wow lehbeiñ klambeiñ ya ki bru wa em ya u khñiang HIV heiwa da em ka aiñ wow yada ya kam kini ki bru heiwa ki bor District kamjooh ki pulit u pyntikna ki wa kreh kani ka aiñ ha ka District.
Ka Dr. (Mrs) N.P. Suchiang da ong ko wa i kaam wa kongsan tam yong ka seiñ Meghalaya State Network of Positive People (MSNP+) toh wow pynlang ya ki bru wa em HIV wow krehlang wa ki chnat sorkar, ki bor ka aiñ, ka chnat i chait i khiah, ki khynnah wa ki paidbah kamjooh.
U Ajoy M. Lanong, Assistant Director, Main Streaming Meghalaya Aids Control Society da ong u wa ka International AIDS Candlelight Memorial da wanrah ko ya ki bru ka pyrthai chirup wow kynmoo ya kiwa da khlaad na ka AIDS, wow kyrchaan ya kiwa em ya uni u khñiang wei wow pynyoo hadooh katwon ki seiñ wa ka imlang sahlang embynta ki wow yakhun ya kani ka kjut.
Da batai u leh chaphang ka aiñ HIV & AIDS Act 2017, heiwa da chna ya kani ka aiñ wow yada ya kiwa em HIV, wei hapoh kani ka aiñ da khang wow lehbeiñ ya ki la ha ki thaw paidbah næ ki thaw ki bru samen.
Ha kani ka sngi da thang leh yei mombati kam ka dak wow kynmoo ya kiwa da khlaad wei da yoh leh i khana parom na ka Agui Daimei waka Virgil Suchiang.
