Jowai: Kamwa da jooh leh man u snem haka 30 tarik u Kmaichonglad yow kynmoo warom yaka lyngkhooh sngi yap u Woh Kiang Nangbah khlawait ka Ri-loom Jaiñtia, ha uni u snem leh haki thaw waphær waphær da chim yaka bynta wow kynmoo warom ya kani ka sngi wei ynne ka sngi ha Jowai neiliang ka Seiñraij Jowai hadien wa dep ki wow booh syntu ha u mot dur sah naam yong u Kiang Nangbah ha Loom Mooliksoo ka thaw wa pyndep yaka lehniam khaddooh ya i met yap yong u Kiang Nangbah da em won saka yalang kynmoo warom ha Myngkoi Pyrdi Iongpiah wa da wan emlang u montri ka chnat Sport & Youth Affair ka sorkar jylla u Banteidor Lyngdoh, u Dr. W.R. Kharlukhi Retired Associate Professor ka Synod College Shillong, ki paidbah wa kiwi kiwi.
Ha kani ka sngi da kyruiñdien wow kynmoo yei im yong u Kiang Nangbah uwa da yakhun pyrchah wa ki phareng na i thmu shynchaar embor yong ka yaka jaitbru kam wow khrong dan nalor kiwi won kawa da ktah yaka riti dustur wa ka imlang sahlang, wei kam u dap mynsien chynrang hadooh ka sngi yap leh ym ym e laad næ pyndem u, hadooh hachwa wa ki phareng u sdien phasi da klam u yaki kyntien khaddooh deiwa ong, lada i khlieh yong oo u kyruiñ i cha ka mihsngi hapoh 100 snem daw yoh yei laitlooid ka ri, lada kyruiñ cha sepsngi won, chirta daw chong broo, kamtæ i khlieh yong oo da kyruiñ ki cha mihsngi wei hapoh 100 snem ka ri da yoh laitlooid.
U Dr. Kharlukhi hawa e yei klam hajrong ka yurim yong u Kiang Nangbah da ong da man u utæ uwa pyntipchwa yong ka jaitbru wei uwa em ka yurim, neibhah du hadien wa u paidbah da jied ya oo wow man kam uwa yahkhmat da hiar ha madan Madiah Kmaiblai Syntu Ksiar wow paan i bor na u Blai wow yieñ haka yurim ka jaitbru.
Hawa yatoh wa i rukom shynchaar paidbah da ong u, wa i toh u sarong neibhah i da em chwa i ka rukom synchaar paidbah chwa wow wan ki phareng, neibhah haki Elaka waphær waphær da synchaar daki Dalloi ya uwa da jied da u paidbah hi, tangwa ka rukom pyrkhat pyrdaiñ synchaar paidbah da ih bha haka jaitbru toh ha i por u Kiang Nangbah.
Neiliang u Banteidor Lyngdoh won da e yaroh u yaka Seiñraij Jowai kawa chim ka bynta wow kynmoo warom ya u Kiang Nangbah naki snem cha ki snem, wei da ong u wa kani toh kawi naka parom hiar pateiñ hapoh Khasi Jaiñtia wa kam u bru dap chynrang da yakhun na i chah thombor ki paaid ka Ri-loom Jaiñtia kiwa man ki tre chnong tre thaw.
Da pynbna u leh wa daw e sñiawbha ha u snem thymme yaka Seiñraij neibhah wa nadooh ki por wa da dep wa da wan wow paan yarap kamwa T. 3 lak tam neibynta ka Seiñraij Indoor Hall. Ha i jooh i por da kular u wow yaklam wa u Chief Minister wa ha kam kani ka sngi wym du wow e chuti haka jylla wot hadooh waroh ki chnat sorkar leh u pynyoo yaka dak kynmoo warom.
Kiwi de wa klam kynthup ya u O.R. Challam President Seiñraij Jowai, u EMH Passah u Treasurer Seiñraij Jowai, u Arwotki Sumer u General Secretary Seiñraij Jowai.
Haka yalang kynmoo warom kawa pynman daka seiñ Kiang Nangbah Iasiat Khnam Memorial Society ha madan Kiang Nangbah Memorial Park, Syntu Ksiar, ka thaw wa em u mot sah naam yong u Kiang Nangbah da emlang u A.L. Hek u montri ka chnat Art & Culture ka sorkar jylla, ki Dolloi naki Elaka waphær waphær wa kiwi kiwi.
U A.L. Hek hawa klam kam u kongsan da ong u wa kam ka jaitbru i kmen i chiboon wow yoh u dap chynrang wow e kti neibynta ka riti dustur ka imlang sahlang, wei lada ym em kam u Kiang Nangbah ka jaitbru Pnar da chah pyndooh pyndam noh haka bor synchaar ki phareng.
“I em i chiboon bah ki thma yaleh hawa im, nachwa pynemkaam wow yakhun daka wait ka stieh ka suloi, tangwa katni won da i bor jabieñ, i bor stad, wei ka thma wa hap yakhun katni won toh wow beh noh ya i beij, ki bor pynsih ya iwa im i wa kiwi ki bor pynsih yaka imlang sahlang,” ong u A.L. Hek.
Ha i jooh i por da khut da wer u leh ya kiwa yahkhmat ka seiñ Kiang Nangbah Iasiat Khnam Memorial Society wow ya krehlang hawa yatoh u chna yaka Museum u Kiang Nangbah ha Syntu Ksiar, neibhah ye wow chna yaka Museum wow taan ya kiwa wan uiñke na kylleiñ ki thaw.
Chwa ini da em leh i booh syntu ha u mot sahnaam yong u Kiang Nangbah ha katai ka thaw, wei da yoh yei klam na u P. Toi u President ka KNIKMS, na u C. Najiar u Executive Member ka KNIKMS, na u Dolloi ka Elaka Jowai u Puramon Kynjin wa kiwi, nalor wa saam leh yaki khusnaam cha kiwa jop haki yakob waphær waphær wa da pynman chwa kani ka sngi.
Discussion about this post