Yaka World Water Day da kynmoo yaka ynne ka sngi daka yung krehkaam u Executive Engineer (PHE) Rural Water Supply, Jowai haka yalang wa pynman ha District Library Auditorium, Mynthong, Jowai hajrong ka thong ‘Valuing Water’ iwa mut wow kheiñkor yaka um. Neiliang u Additional Deputy Commissioner u P.K. Boro da wan u kam u kongsan.
Da emlang leh u Additional Deputy Commissioner u L. Kynjing, ADC ka D.D. Syngai, EAC ka Y.R. Mawlong wa u EAC u MA Challam.
Yaka yalang da sdang chwa da i lai paidbah yow pynbna wyrta yei emkaam wow kheiñkor yaka um.
U P.K. Boro hei klam yong oo da pynkynmoo u yei duna ka um wa hoi u dih wei yei wym chimkhia i wow yada yaki tyllong um.
Ka R. Kynjing, Member Secretary DWSM hawa klam hajrong ka phang pyrdi da klam ko yei emkaam wa da booh ya kani ka sngi. Da ong ko wa ya kani ka sngi da kynmoo yaka ha waroh kawi ka pyrthai yow wanrah yei pynsñiawthooh paidbah yei emkaam wow pynneh pynsah yaka um.
Neiliang u Damang Wann, IEC Coordinator da pynyoo u ya ki thong wa da poi hapoh ka Jal Jeevan Mission (JJM) hapoh ka District.
Ha kani ka sngi da pynman leh yaka pynyoo rong ya ki buit wa da pynkreh da ki khynnah skur hajrong ka phang ‘Save Every Drop Counts’ heiwa da e khusnaam leh cha kiwa jop.
Kiwa chimbynta ynne ka sngi da yoh ki leh wow sakhi yei sdang yaka Jal Shakti Abhiyan-II ‘Catch the rain, where it falls, when it falls’ kawa da sdang da u Prime Minister, Narendra Modi lyngba ka Internet.
Ha chwa ini, ka Beautify Suchiang, Coordinator for Capacity Building da e ko ya ki ktien pdiang burom.
