U Lahkmen Rymbui, Montri ka chnat Kaam Pohyung ka sorkar jylla hawa e yei klam haka yalang wai mooyurim neibynta u chna ya u sarok na Kudengrim cha Kudengthymmai ynne ka sngi, da ong u wa ki luti syngkieñ hapoh ka Amlarem Constituency kawa oo mihkhmat u, toh la kamwa 80% da yoh poisa neibynta u chna.
Khana u wa em u leh i yoo jngai hajrong i emkaam u chna pynyabi ya u sarok na Shnongpdeng hadooh Amkoi lada e thaw ki tre wei deiwa yoh i krehlang ki paidbah, neibhah wa man uwa emkaam bha heiyatoh u pynku yei yoh i kot.
Hawa pynsñiaw u yei kaam pynroi waphær wa wanrah lyngba yong oo hapoh ka Amlarem Constituency kmen haroh u wa ka chnat Tourism da mang ko T. 40 kur tam neibynta i chna heiyatoh u pynku yei yoh i kot yong ka thaaiñ lyngba i wan hiar ki bru wa nabaar u paitke yei yoosuk ka thaaiñ, najrong kamwa T. 2 klur tam ka chnat C&RD da khut Tender ko u chna yaka yung krehkaam ka Amlarem C&RD Block khnang yow lait nei khynnia.
Heijooh i por khana u wa yaka Padu Dispensary leh da kynthup yaka yow man ko kam ka Urban Health Centre neibynta u ye u pynpliah chooh chuh i rukom e chakri heiyatoh wa i chait i khiah.
“Haka Politics teiñ teiñ yaklam i ya kani ya katai, tangwa hawa kut, toh u pait iyi myntoi ki paidbah wei iyi wa emkaam tam,” ong u Lahkmen.
“Kam kiwa chong chnong wymtoh u chongchit du heipor Election wei 5 snem won yoh thiah. Nga pait O waroh 5 snem neibynta yow hoi yow biang u paidbah kamwa nga em O i yoo jngai neibynta i bha i miat ka Constituency, han lymtoh iwa suk”.
Hajrong i kylli kiwa boon wa ong, u Lahkmen iyi leh u? Neiliang u Rymbui da kyntu u ya ki paidbah wow pait wei pyrkhat. Neitæ hajrong wa kylli ki paidbah wa ong kammon ka chnat Tourism u chna sarok ko ha Kudengrim-Kudengthymmai daka poisa yong ka Tourism, ong u kam kiwa mihkhmat hap wow pait, wei ong haroh u ki paidbah man ki kiwa mahajon tam lada yoh ya kiwa mihkhmat wa ye u lithooh yei hok u paidbah, weiwa la bien hi kiwa mihkhmat u chimkhia wei em i sap ym man iwa eh hadooh kattæ kattæ.
“Nga kyntu ko ya ki paidbah wow man kiwa syndong, waroh emkaam i yei yong samen tang iwa sñiawsuk tam toh hawa i yoh i i kot wei i roi i paar em ko hapoh ka Constituency,” pynrap u Lahkmen Rymbui.
