Ka Jowai Ladrymbai Khliehriat Tourist Taxi Association deiwa ya krehlang chirup wa ka All Jaiñtia Tourist & Commercial Vehicle Association (seiñbei) da pyntip paidbah ko, khamtam cha kiwa chong kari kiwa chaniah ha ki kari kamai, wa neidaw wa ka sorkar da pynman Containment Zone ko ya ki kattu katni tylli ki dong wa em ha Ladthalaboh, Jowai kamjooh ya ka Iaw Thymme, kamtæ ym yoh de ki wow thap bru ha i thaw wa jooh thap iwa da booh hei eh ya ki paidbah.
Neiliang ka seiñ da lai yachem ko wa ki bor sorkar wa toh u pait ya i lai i wan, wei da yoh wow pynbait waka yung krehkaam ka Jowai Traffic Police wei da sñiawkmen ka seiñ wow pyntip cha ki paidbah wa nadooh ka 4 tarik uni u bnai, i thaw wow thap bru lane wow yang bru toh ha Laad Kiang Nagbah College kat wym pu chah wow thap bru ha i jooh i thaw wa jooh thap nachwa.
Kamtæ da kyrpaad ya phi ki paidbah wow sñiawbha u yakrehlang yow ye u chakri deiwa rap bha.
Ka seiñ kyrpaad ko leh ya waroh ki seiñ kamai kari wow sñiawbha ki u yakrehlang chirup chirup, wei ym hoi wow chim kabu, lada em kiwon kiwon ki bru wa thooh kari wow sñiawbha u khana ya ki ya i thaw wa yang ki kari ya ki.
Ka seiñ da maham ko leh ya kiwa yah kari kiwa yaleh pyrchah wa lada em kiwon kiwon kiwa leh tam, ka seiñ daw Suspend ko ya ki chirup wa ka kuna kawa heh bha wei ye ki leh u chah pyndooh ya i man dkhot hapoh ka Association.
Khaddooh ka seiñ e khublei ko ya ka Jowai Traffic Police kawa kreh chitom doh wa mynsien wa smat ko wow yarap heiyatoh wow pynbait ya ka lai ka wan.
Ka seiñ e khublei ko leh heijooh i por ya ka All Jaiñtia Tourist & Commercial Vehicle Association (seiñ bei) wa smat ko wow yakrehlang wa ki na i por cha i por.
