Jowai: Ka “Poshan Abhiyaan” kawa maan kawi naka thong yong ka sorkar pyrdi wow pyllait na i duna ki jait baam wa tei yei doh i pran ki khynnah, ki manbei wa punkhon, khnang yow lait ki nei duna i bor wa i khia, i yada na ki jait kjut waphær waphær katkam i rta wa kiwi, ha kani ka kynti da dap chisnem pura i lai luti yong ka ha kylleiñ ki chnong ki thaw ka West Jaiñtia Hills District wow pynsñiawthooh hajrong i emkaam wow yoh i jait baam wa tei yei doh i pran.
Kamtæ kam ka dak i leh burom yeini i dap chisnem, ynne ka sngi da pynman yaka prokram “Poshan Pakhwada” næ Nutrition Fortnight.
Ka R. Bareh, CDPO Thadlaskeiñ Block hawa e ki kyntien yahkhmat da khana ko wa ha uni u bnai kani ka prokram u man ko 15 sngi lynter nadooh ka 8 hadooh 22 tarik ha ki chnong waphær waphær, wei heijooh i por kyntu ko ya ki paidbah wow yakrehang ki neibynta u pyndooh i kjut duna snam, i kjut duna baam kawa da tip toh kawa boon bha haka jylla yong i.
Da baan joor ko wa i baam toh iwa kongsan taam ya ki bru wei hawa baam ym toh u baam du kat u im, tangwa toh u baam yaki baam wow tei yei doh i pran khang yow yoh i chait i khiah wei wow pynkhlan bor.
Ya kani ka prokram da pynman daka yung krehkaam ka District Programme Officer ICDS (Cell) West Jaiñtia Hills, ha Iaw Pynsiñ Wahiajer, chirup i krehlang waka chnat i chait i khiah wa kiwi.
U Dr. Rymbai Medical Officer Ummulong CHC, da kyntu u yaki manbei wa punkhon wow wan leh ya ki Check-up tista wei kamjooh wow pynyoh tika yaki khon katkam i por wada booh khang yow man ki kiwa chait wa khiah.
Ki paidbah da yoh haroh ki i pynche hajrong ki Scheme yarap wa haap hapoh ka chnat i chait i khiah kawa ye ki u chim kabu kam ka Pradhan Mantri Matru Vandana Yojana (PMMVY) kawa toh ka Scheme yarap wa T. 5000 yaki manbei wa 19 snem chaneiñ kiwa kha yaki khon nyngkong, da yoh haroh ki i pynche heiyatoh waka Scheme MHIS kawa ki paidbah ye ki u yoh myntoi heipor wa kjut wa chitom natlor kiwi won ki pynche wa yatoh hajrong i thmu wow pynsñiawthooh yei emkaam i chait i khiah.
Ha kani ka sngi da em leh ki Stall waphær kiwa e yutip wa rapbniah cha ki paidbah wei chwa ini heipor step da em leh i phet Marathon wada sdang na Ummulong Lad Wahiajer wei pynkut won ha madan bol Wahiajer.
Discussion about this post